Manipur-a Zohnahthlak pawl hrang hrangte inthlunkhawmna, Zo United hruaitu tur chu Nilaini khan Aizawla Central YMA Hall-ah an inruat fel.
Manipur sawrkara Zohnahthlak zinga cabinet minister Letpao Haokip chuan a kaihruai a, Manipura Zohnahthlak pawl hrang hrang hruaitu mi 48 telin, Manipur sawrkara Zohnahthlak minister 2 leh MLA 5 an tel bawk.
Pawl hrang hrang aiawh kalkhawmte hian kumin September 6-a (Mizoram) NGO Coordination Committee kaihhruainaa Zo United din tawh chu tha taka a kal theihnan inlungrual taka thawhho an duh tih an sawi a. Pawl hruaitu tur pawh lungrual takin hetiang hian an inruat: Convener – Albert L. Renthlei, (Mizo People Convention), co convener – John K Ngaihte (Zomi Council) leh Ajang Khongsai (Kuki Inpui Manipur), secretary (Recording) – Lalhrillien (Hmar Inpui), secretary (Finance) – Thanglen Kipgen, secretary (Info & Publicity) – Pagin Haokip. An ni bakah hian pawl hrang hrang aiawh Committee member an ruat a ni.
Zo United hi Manipur-a Zohnahthlak unaute inpumkhatna tur leh inlungrual taka an thawhhona tura pawl din a ni.
Manipur Zofate inpumkhatna pawl Zo United hruaitu inruat
