Mannarino hneha Cincinnati last eight lut Sinner
Grand Slam title pali hawn ve tawh world number one Jannik Sinner chuan player khawng ve tak Adrian Mannarino laka 6-4 7-6 (7-4)hnehna changin Cincinnati Open men’s singles quarter-final a lut a, Italian hian rinkai a nihna a nemnghet chho zel.
Sinner hian Frenchman tawnhriat ngah lakah hahdam lutuk loin set khatna a la a; set hnihnaah kum 37-a upa Mannarino hian chuti maia tlawm a tum bik tlat lo a, ranking lamah world number 89-na daih niin, an inthlauhna a san em avanga inpek nghal a tum lo tih lantirin a tang thei nek a; hnehna a chan hnuah Sinner pawhin khelh harsa zet a nih thu sawichhuakin, “Ka hmachhawn tawh dang zawng zawng aiin a danglam bik a, veikhawr a nih vang piahlamah hniam taka a rawn hlap phei thin a, ka talbuai deuh lai thin a; mahse, khati ang chu chu he sport-a thleng ve thin pangngai ani a, round dang ka chuangkai leh thei hi ka hlim em em a ni,” a ti.
Inkhel dangah second seed Carlos Alcaraz pawhin a career la thui lo taka a vawi 18-na atan tennis inelna level sang Masters 1000 quarter-final a lut ve bawk a, he hmun thleng tu hian a tumpui Italian Luca Nardi lakah straight sets 6-1 6-4 hnehna a chang.
Five-time Grand Slam winner Alcaraz hian a match khelh hnuhnung tum 38-ah tum 36 zet hnehna a chang tling ta a; semi-final luh inchuh match pakhata a tum leh tur Russian Andrey Rublev chuan Argentine Francisco Comesana lakah 6-2 6-3 hnehna a chang ve bawk.
Kum 22 mi Spaniard Alcaraz chuan hnehna a chan hnuah, “He match hi tun tournament-a ka la khelh that ber niin, vawiina ball ka tawh dan leh ka chel vel danah ka lungawi a, ka hlim veng veng a; boruak hnawng uap lum sa vung vung ka paltlang dan kha a duhawm hle a ni,” a ti ve bawk.
Seventh seed Holger Rune pawh quarter-final lut zingah telin, 6-4 3-1- a a hnufual laiin American 10th seed Frances Tiafoe chu hnungzang na avangin a inhnukdawk a, Rune hian hahdam zawkin last eight a chuankai theih phah.
Fourth-round match dangah German Alexander Zverev pawh a tlang ve bawk.
Mannarino hneha Cincinnati last eight lut Sinner
