Maoist laka beihpui thlaknaa CoBRA commando thi

Maoist laka beihpui thlaknaa
CoBRA commando thi
Chhattisgarh-a Sukma district-ah Maoist helho laka beihpui thlaknaa Ningania inkahna thlengah CoBRA (Commando Battalion for Resolute Action) comando pakhat leh hel nia hriat pakhat an thi niin police-in an sawi.
Police chuan Tumrel khuaa inbeihna thlengah hian commando dang pahnihin hliam an tuar bawk niin an sawi a. Maoist thi hi tunge a nih hriat a la ni lo va, a thawhpui dangte zawn hna thawh chhunzawm mek zel a la ni tih an sawi.
Commando thi hi Mehul Solanki a ni a. “IAF (Indian Air Force) helicopter hmanga hliam tuarte phurh chhuah tumin hma lak nghal a ni,” tiin officer-in a sawi.
CoBRA hi Central Reserve Police Force (CRPF) hnuaia unit tha bik (elite unit) an ni.
“Beihpui thlakna hi CRPF-a CoBRA 210th battalion leh Chhattisgarh Police, DRG (district reserve guard) leh STF (special task force) tanghova kalpui niin a hmain ram hnuaiah Maoist-te an inkulh tih thu dawn bawhzuinaa che chhuak an ni,” tiin Sukma police chuan thu an chhuah.
“Inkahna a thleng a, silai puak a reh hnuah Maoist ruang pakhat hmuh zui a ni a. CoBRA commando pathumin silaimu an tawng fuh ve bawk a, an zinga pakhat hi a hnuah a thi zui ta a ni,” an ti.
Nilaini tukah khan Communist Party of India (Maoist) General Secretary Nambala Keshava Rao, Basavaraju tia hriat telin Maoist hel 27 chu Narayanpur ramngaw, Chhattisgarh-ah thah an lo ni tawh a, beihpui hi thlak chhunzawm zel a la ni.
Union Home Minister Amit Shah chuan Nilaini khan an ram laili, Chhattisgarh-ah hel 27 an thah zingah Nambala Keshav Rao, Basavaraju tia an koh thin bawk a tel tih a sawi a ni.
Rao-a hi Union Home Minister Amit Shah chuan Naxal movement-a ‘an hruaitu lawk ber leh an rinrawl ber’ a nih thu a sawi a. “Tun hi kum 30 chhunga India-in Naxalism laka beihpui a thlak tawha kan sipaiten general-secretary nihna chelh hruaitu an thah hmasak ber a ni,” a ti a. “Hetiang hlen thei kan venhim hna thawktu leh agency-te ka chhuangin ka lawmpui tak zet,” a ti bawk.