Union Home Minister Amit Shah-a’n August, 2024-a March, 2026-a India atanga Naxalism um bo hman a tiam tawp atangin thla thum hun a la awm a, hetih lai hian Chhattisgarh Additional Director General of Police (Naxal operations) Vivekanand Sinha chuan venhimna hna thawktuten ‘chan tha’ an chang mek tih a sawi a, Maoist-te chu ‘nunphung pangngaia kir turin’ a sawm bawk.
“Naxal vanga kan buaina hi a tawp thuai dawn.” tiin Sinha chuan The Indian Express hnenah Inrinni khan a sawi a. “Chan tha lam kan chang mek a, kan sipaite pawh an phur a. A la awmte hi an ralthuam dahah nunphung pangngaia lo kir turin kan sawm a ni,” a ti.
Inrinni han hmun hniha beihpui thlakna lian takah hlawhtlinna an chang leh bawk a. Chhattisgarh-a Sukma leh Bijapur district-ah Maoist 14 an that a, People’s Liberation Guerrilla Army (PLGA)-a Battalion 1 commander Barsa Deva chu a inpe bawk.
Maoist hi May thla khan general secretary Basava Raju thah niin Battalion 1 commander Hidma chu November thah a ni bawk a, hei hi kum liam ta chhunga an pawl hniam chhan lian ber pakhat a tling.
Nikum chhung khan police hian Chhattisgarh, Andhra Pradesh, Odisha leh Jharkhand-ah Central Committee Member (CCM) 10 thah an ni a Dandakaranya Special Zonal Committee (DKSZC) panga thah an ni bawk.
Kum 2024 atanga an laka beihpui thlakah hian Maoist hel pawla tel 500 chuang thah tawh an ni.
“Kum hnih liam ta (2024–2025) chhungin venhim hna thawktuiten vawi 223 beihpui an thlak a, Maoist 473 kah hlum an ni a, 1,827 man an ni a, 2,365 an inpe bawk,” tiin Bastar Range Inspector General of Police Sundarraj P chuan thuthar lakhawmtute a hrilh.
IED puakah venhim hna thawktu 42 an thi a, civil mi 117 an thi bawk.
Helho lak atang hian AK-47 riffle 42, INSAS Light Machine Gun (LMG) pathum, Self Loading Rifle (SLR) 39, INSAS rifle 47 leh carbine pasarih laksak an ni a, IED thahnem tak hmuh a ni bawk a. Maoist laka beihpui thlak a sawt zawk theih nan Bijapur, Narayanpur leh Sukma district-ah police camp 88 siam a ni bawk tih a sawi.
Maoist lakah chan tha kan chang mek – Police
