Cheng nuai 210 senga Lungleia Mara Tribal Girls’ Hostel sak thar chu Thawhtanni khan Sawrkar laipuia Minister of State for Tribal Affairs Renuka Singh Saruta chuan a hawng.
Zan khat leh ni hnih cham turin Union MoS hian Thawhtanni khan Mizoram a rawn thleng a, Lungleiah tlang nghalin, Special Central Assistance to Tribal Sub Scheme kaltlanga Lunglawn Lungleia Girls’ Hostel sak hi hawngin, kawlphethaah emaw tui thianghlimah emaw Mizote mamawh leh an harsatna a hnena thlen turin mipui a chah a. A tul ang zela Prime minister hnenah thlenpui a tum thu a sawi. Mizo mipuite chu ramri depa awm leh cheng an nih anga ramri venghimtu an ni chu lawmawm a tih thu a sawi a ni.
Mizoram chu ziak leh chhiar thiam ram a nih anga hmeichhiate dinhmun pawh a that thu Renuka Singh Saruta hian a sawi a. Hostel building hawn chu lawmawm a tih thu sawiin, a tul anga a dang pawh ngaihtuah belh a nih tur thu te, hmeichhiaten thiamna kawnga nasa zawka hma an sawn a duh thu te a sawi.
Hmeichhe dikna leh chanvo hriat a tul thu sawiin, ram hruaina kawngah pawh hmeichhiaten chanvo nei tura tan la turin a chah.
Union minister of state chuan mipui hmasawnna turin scheme hrang hrang sawrkar laipui atanga thehchhuah thin a nih thu sawiin, scheme thil tum leh awmzia hrechiang lo mi tamtakten hrechianga hmang tangkai turin theihtawpa tan lak a tul thu a sawi bawk.
Mara Tribal Girls’ Hostel building hi Phako Builders Khatla Aizawl sak niin a project cost hi nuai 210 a ni. Chhawng 4-a sang niin, hostel room 14, toilet 11, bathroom 6, dining hall leh facility dang engemawzat a awm a ni.
Union MoS Renuka Singh hian Lungleia sawrkar department hotute kawm nghalin an hna leh an hmalakna hrang hranga hma an lak dan leh an harsatna a ngaihthlak sak a. Hemi hnu hian NGO hruaitute a kawm a ni.
Mara Girls’ Hostel hawng
![](https://theaizawlpost.org/wp-content/uploads/2023/02/mara-1-1024x683.jpg)