1986 World Cup-ah Diego Maradona hoin Argentina an champion a, June 29, 1986 Mexico City final-ah khan South American team chuan West Germany hnehin, Argentina captain Maradona chu tournament best player atan thlan a ni a, kha mi tuma best player lawmman Golden Ball trophy kha France rama lilam a nih tur thu nimin khan thil hlui leh hlu lilamtu Aguttes auction house chuan an puang.
Tun hi World Cup Golden Ball an lilam vawikhatna tur niin, an lilam tanna tur hlut zawng hi tihchian a la ni lo a, lilamtu tur auction house lam chuan June ni 6-a an lilam tanna tur hlut zawng hi US dollar maktaduai tel fe chu a nih an beisei.
Tarlan tawh angin, kum 2020-a thi ta Maradona khan Mexico ram World Cup-a an ram a champion-pui rualin player tha ber lawmman a dawng tel a; kha tournament-ah khan goal nga khungin, tournament chhungin minute tin a khel kim vek a ni.
Kha Mexico ram World Cup-ah khan quarter-final match-a a goal hnih thun hmangin Maradona chuan khawvel theihnghilh tawh loh tur goal a khung a, English-ho thin tiurtu kumkhua a ni!
A goal khatna chu a kut hmanga a chumluh niin, England keeper Peter Shilton nen ball kang an inchuh laiin Maradona khan Shilton-a lu chunga ball chu a chumlut a, a hnuah a goal khung kha ‘Hand of God’ tiin a phuah a, England mipui thin a rim zual!
A goal hnihna erawh sawisel tur awm lo khawpa ropui niin, khelmual laihawl atangin England goal lamah a khalhlut a, English outfield player panga a bum hnuah goal ropui khungin, kha goal kha ‘Goal of the Century’-ah an puang zui ta nghe nghe a ni.
Kha mi tuma a jersey hak leh England an hneh tuma an ball hman kha lilam a lo ni tawh bawk.
England laka goal hnih a thun hnuah Maradona khan semi-final match-a Belgium an hneh tumin goal hnih bawk a thawh leh a; final hmuhnawm leh boruak sang zetah Argentina chuan 3-2-in West Germany an hneh zui leh ta a ni.
Golden Ball award hi 1982 World Cup atanga sem tan niin, World Cup-a player tha ber nihna lo chang ve tawh dangte chu Italy star Paolo Rossi, Brazilian pahnih – Romario leh Ronaldo-te, Zinedine Zidane of France bakah Argentine great Lionel Messi chu he chawimawina vawihnih dawng thei awmchhun a ni.
Maradona Golden Ball trophy an lilam dawn
