Kumin June-a sawrkar laipui atanga an hlawh tur pek tawh Dampa Tiger Reserve Forest-a thawktute chuan kumin March atang khan hlawh an la tawh lo niin Aam Aadmi Party chuan an sawi.
AAP Mizoram thuchhuak chuan, sawrkar laipui Ministry of Environment, Forest & CC hnuaia Dampa Tiger Reserve enkawlna tur, Mizoram sawrkarin kum kal mek 2024- 2025 atana sawrkar laipuia a dil cheng nuai 378.26 atangin 1st instalment nuai 85.10850 chu kumin June 10 khan Mizoram sawrkar kutah pek a nih tawh laiin, kumin March atanga vawiin thlengin an thla hlawh an la lo tih a sawi.
‘Mizoram sawrkarin kum 2024- 2025 atana Dampa Tiger Reserve Forest enkawlna tur sum a kawl tawh chunga tun thlenga, hnathawktute hlawh thla 7 dawn a hrensak hi hnathawktute a ngaihsak loh zia a tihlannaah kan ngai a. Kan ramngaw leh nungcha humhalhna hmun hi central atanga an sum hmuhnan leh sum siamnan chauha hmang loin, Mizoram sawrkarin a ngaihsak tak tak kan duh a, hnathawktute hlawh pawh rang taka pe chhuak turin kan ngen a ni,’ a ti.
March atangin Dampa Forest thawktuten hlawh la lo – AAP
