Match tam berna tur 2026 FIFA WC
Nikum Qatar ram Fifa World Cup-ah khan ram 32 chhuakin, ni 29 chhung khan match 64 khelh zawh a ni a, 2026 World Cup-ah chuan team 48 an inlan tawh dawn a, World Cup awm tawh zawng zawnga match tam ber ni turin game 104 khelh a ni dawn tih Thawhlehni khan Fifa chuan a nemnghet.
Mexico (1986) leh United States (1994)-in World Cup an thlen tum khan team 24 chauh inlanin, an pun hret a, nikum Arab ram tournament thleng khan team 32-in trophy an inchuh a; United States, Canada leh Mexico-in 2026 World Cup an inthlentawm hunah chuan kum 1998 atanga tihdanphung ngheta an neih tawh match 64 (64-game format) kalsanin match 104-ah an kai chho dawn ta a ni.
1998 edition atang khan team 32-in tournament an khel a, team pali zelin group pariata then an ni a; a tawp khartu finalist team pahnih chuan match sarih ve ve khel tlingin, kum 2026 World Cup atang chuan final lut team pahnihin match riat ve ve an khel tling tawh dawn a ni.
A tira an ruahman chhin dan chuan 2026 tournament-ah hian match 80 khelh tur a ni a, mahse, Thawhlehni khan Rwanda khawpui Kigali-a Fifa Council meeting chhimtu football thuneitu lawk rual kalkhawmte chuan match 80 atangin match 104-ah an san a, round of 32 stage thar an pawm nghal bawk.
Fifa thuchhuah chuan group tina a sang pahnih bakah group-a pathumna team zinga a sang pariatin last 32 an luh theihna kawng hi an hawng ta tih an nemnghet a ni.
Fifa thuchhuah chuan, “Fifa World Cup 2026 competition format chu 16 groups of three atangin 12 groups of four-ah Fifa Council-in a san chho a, group tina top two theuh leh third-placed team tha pariatin round of 32 an luhna tur pawm a ni.
“Fifa World Cup tournament khelh dan ennawnin a tum chu team thenkhat inkara insiamremna awm thei nuaibona tur niin, team tinin a tlem berah match thum an khel tling ngei ngei dawn a, hei bakah hian tournament khela chhuak team-te’n rualkhai zawka hahdamna hun an neih theihna tur kawng zawnna a ni tel,” tiin.
Three-team group-in insiamrem hlauhthawnna a thlen theih avangin he kalphung tharah hian group khata team pali zel khungkhawm an ni tawh dawn a; kalphung pangngaiah kha chuan group tina a sang pahnih zelin last 16 an lut phawt a, 2026 edition-ah hian pathumna team zinga a sang pariatin knockout round of 32 an chuangkai tawh zawk dawn a ni.
Tarlan tawh thin angin, nikum champion Argentina khan 2022 World Cup trophy an hawnna kawngah game sarih khelin, kan hma chiah tournament-ah hi chuan final lut team pahnihin hei ai match tam hi an khelh a ngai tawh ang.
Rwanda khawpuia rawtna thar an pawm hma nikum December thla khan Fifa president Gianni Infantino chuan Fifa-in khelh dan kalphung thar a ngaihtuah tur chhan sawiin, Qatar-a group stage final game thenkhat phurawm lutuk avang khan team thenkhat inkara engngemaw felhlel awm thei hlauhthawn thilah format thar rawtna hi a chak lehzual tih a sawi.
Group khata team pathum zel dahkhawm khan fuh tawk lohna pahnih a nei nia ngaihna a awm reng thin a; group-stage game hnuhnungbera chak lote’n an game hnuhnungber pahnih khel ve bawk team dang pahnih tan kawng an sial thei.
Entirna pakhat chu ‘Disgrace of Gijon’ tia an sawi tak mai kha niin, Spain rama 1982 World Cup nghah a nih tum khan West Germany leh Austria chuan sikhat faia German-ho chak ni se tiin inremna an lo siam ru a, chu result avang chuan an pahnihin round sang zawk an kai a, Algeria an tlak phah!
Hetiang insiamremna thawm hriat tur awm zauh zauh hian Fifa hmai a timawk a, 2017 World Cup-a hman tan tur 16×3 format hman an pawm chungin thil a la felfai thei tak tak chuang lo.
Nikum Qatar lama group stage final game phurawm lutuk khan 2026 World Cup atana kalphung thar rawtchhuah hi a hringchhuak ve leh ta bawk a ni.
Group khata team pali zel dahkhawma group 12 awm tawh tur hi fuh tawk lo thei tura ngai pawl an awm chho ve reng a, mahse, Qatar ram tournament zawh hnu kha chuan kalphung thar hian thlawp a hlawh ta duak niin a lang a; tarlan tawh angin, final khelh hma lawk khan Fifa president Infantino ngeiin format thar chung-changa rawtna awm an ngaihtuah nawn tur thu a sawichhuak a, tun Thawhlehni khan football boss rualin an pawm ta nge nge a ni.
Kum 2026-ah chuan marathon men’s soccer championship kan hmu dawn ta a; team 48-in ram pathumah ni 40 dawn thuak chhungin match 104 an khel tling dawn a; champion leh the runner-up bakah pathumna leh palina inchuh team-te’n game sarih ni thin kha game riat an khel tling tawh ang.
Kalphung thar pawm fel a nih hnua chanchinbumite a kawmnaah Fifa vice president leh North America football hotulu ni bawk Victor Montagliani chuan ngaihdan tha tak nia a ngaih thu a sawichhuak.
Tuntum Fifa Council meeting hian kum 2025-2030 chhunga hman tur men’s international match calendar pawm nghalin, calendar thar angin Fifa World Cup 2026 final chu kum 2026 July ni 19, Pathiannia khelh tur a ni dawn.
An thu pass zingah World Cup khelh leh hmasakber tura ram tana koh player kawl club-te’n international player an chhuah hun tur pawh tifelin, May ni 25, 2026 atangin an chhuah tan tur tih a ni a, May ni 24, 2026 chu World Cup khel tur player-in official club match a khelh theih hun hnuhnungber atan dahin, May ni 30, 2026 thlenga confederation club competition match hnuhnung an awm erawh chuan club-in an player kawl an chhuahtir hun tura bituk aia tlaia chhuah an dil thei dawn a, Fifa pawmpuina a ngai thung ang.
He Council meeting hian women’s international match calendar lam pawh siksawi nghalin, kum khata international window vawiruk zel hawn a nih tur thu leh kum 2024 July ni 25 atanga August ni 10 chhunga women’s Olympic football tournament khelh a nih tur thu an pass tel bawk.
An thurel tluk zingah kum 2025 atanga team 32-in Club World Cup an khelh tawh tur thu tel bawkin, 32-team Fifa Club World Cup chu June 2025 atangin kum li dan zela khelh tawh turin an rel nghal.
Match tam berna tur 2026 FIFA WC
![](https://theaizawlpost.org/wp-content/uploads/2023/03/arg.jpg)