Mizoram Maxi Cab Service atanga bungraw thawn leh phurh zingah dan phal loh ruihhlo tawlhruk a awm fo thin tih Mizoram Police-ten an finfiah avangin hemi chungchanga hmalak dan tur relin nimin khan Khawzawl DC hovin an thukhawm a. Heta an rel dan chuan, tun thla November ni 27 atangin thil thawntu leh dawngtu turte nihna bakah thawnna motor neitu leh khalhtute nihna kimchang chu format duan sa hmanga chhinchhiah turin tih a ni a. Maxi Cab-a thil thawn tur reng rengin Counter kaltlangin thawn vek tawh tur a ni a, Khawzawl Tuisenphaiah thil thawnte hi a khat tawkin Police ten Counter lama chhinchhiah nen a inmil em tih cross-checking an nei thin dawn a ni.
Passenger phur lirthei chungah lehzel hetianga hmalak a ngai ta hi, khualzinte zalenna tihbawrhbanna a ni dawn a, a pawi hle a. Chutih rualin, loh theih lohva hetianga hma lak ngaia kan awm hi kan hriatthiam tlan a pawimawh hle bawk awm e.
Hetianga hmalak a ngai ta hi, ruihhlovin Mizoram a chiah hneh tawhzia lan chianna zel a ni a, a prone area huam chin hmun dangah te pawh hian Khawzawl-in an tih ang hi kalpui a la ngai chho zutin a rinawm.
A pawimawh ber erawh chu, hetia ruihhlovin ram chhung a lo luh fel tawh hnua um kuala inham hnawk vak ngai lo tur hian, a lo luh tanna Khanpui (ramri) ven uluk hi a pawimawh ber niin a lang. Hetianga hmalakna awm si lova ram chhunga a lo luh fel hnua lo reh pin tum hi chu, tuikhuah khi kar atanga tui put, a pawn lama lo char phui tum ang vel a ni awm e.
Heti khawpa ruihhlo Luhkapuia Mizoram a tang ta mai hi, sawrkar laipui pawhin a hre em em ang tih a rinawm a, ruihhlo lo lut tur danna kawnga thapui thawh tur hian sawrkar laipui chakna kan mamawh chu a ni ber tawh a, ruihhlo hi sawrkar pawh hian mutmawh hnarmawha a neih a tul takzet tawh a ni.
Maxi cab service leh ruihhlo …
