Mayor’s Cup champion Ward XII
Goal khat ve vea an inhnehtawk hnuah John Lalruatfela’n penalty vawi hnih a dang a, zirtawpni zan final-ah Ward XII-in penalty petah goal thum goal hnihin Ward VII an hneh a, AMC Mayor’s Cup Inter Ward Football Tournament 2023-ah an champion.
Rajiv Gandhi Stadium, Mualpui-ah Corporator Vanlalneia bial Ward VII-in tha takin bul an tan a, minute kuaah David Lalrinmuana’n freekick petin Malsawmtluanga’n a tauh a, goal veng John-a’n nam per mah se Lalmungliana’n ball per let tha takin a pet lut.
First half tawpna’n minute kua a la awm tihin Ward XII-in an si phurh an sut a; Jeremy Lalfakzuala corner pet atangin Michael K. Lalhriatpuia’n remchang a hmu a, chiang takin a chhuih lut.
Dinthar, Tuikual North leh South telkhawmna team-in hmahruai let theihna hun tha an nei a, minute 57-ah Lalremruata’n ball um falin goalkeeper Lalchhanhima pet khum mah se defender Dicken RL Malsawmdawnga’n goal-a a luh hmain a pet chhuak a, team a chhanhim.
Hun tawp dawnah Zemabawk, Zemabawk North, Falkland leh |huampui team-in an nawr hneh a, remchang bawhpelh zawnin a tawp thlengin an tuar.
Mnute 83-ah Fredy Lalrinchhan-a’n box pawn atangin goal kham a pet per a, a hnu lawkah Lalnunsang-a’n um falin a pet a, goalkeeper che tha tak John-a’n dansakin Lalmal-sawma’n ball per let chang mah se goal chungah a pet chhuak a ni.
Minute 30 hun pek belh an khelh chhungin Ward XII goalkeeper-in lehlam captain David Lalrinmuana freekick pet tha takin a dang bawk a; penalty pet hmanga champion tur an zawnnaah Ward VII-in chak thei turin hun tha nei hmasa zawk leh mah se an puitlin thei chuang lo.
Chhanhima’n Jeffrey Lalmal-sawma pet a dansak a; dinhmun derthawngah Ward XII an awm laiin John-an team a fuih phur a, Gilbert Lalbiaksanga leh Lalruatfela pet a dansak bakah Fredy Lalrinchhana’n goal zawn lovah a pet chhuak a; Ward VII atanga pen chhuak mi panga zinga a hnuhnung pathumin penalty an chhuih lut lo vek a ni.
Corporator R. Thanglura hovin Ward XII-in hlim takin trophy an lawm a, AMC Mayor’s Cup champion hmasa ber an nih rualin lawmman cheng nuaikhat singnga bakah fair player lawmman cheng singkhat an dawng tel a; Tata Yodha Man of the Match lawmman dawngtu John-a kutah goalkeeper tha ber chawi-mawina hlan a ni bawk.
Zemabawk defender Gilbert-a’n Ward VII champion-pui zo lo mah se tournament chhunga player tha bera thlan a ni a; Ward XVII striker Isak Vanlalnunpuia’n top scorer lawmman a dawng ve thung a; mimal chawi-mawina hian trophy, certificate leh cheng sangnga a keng tel a ni.
Ward tin atangin team an tel kim vek a, team lawmman la pha lote hian Rs. 10,000 an dawng vek.
Mayor’s Cup champion Ward XII
