MBA Junior Championship 2026

Yonex Sunrise PC Gabriel Lalliansanga Memorial MBA Junior Championship 2026 chu May ni 19 -23, 2026 chhung khan Ramhlun Indoor Stadium-ah khelh niin, title pathum ve ve latu Vanlalhruaia Sailo leh Lalruatkimite an langsar fal hle.
He tournament-ah hian prize money Rs. 1,11,900 semral niin, chhuak zawng zawngte hnenah he inelna sponsor-tu PC Lallawmsanga (IPS Rtd.)-te chhungkua chuan thilpek an pe vek bawk a ni.
Vanlalhruaia Sailo, Chaltlang Badminton Club chu a telna category zawng zawngah champion fai vekin a triple crown ta a ni.
U-19 Boys Singles-ah Hruaia hian Remruatkima, Kulikawn Badminton Club hnehin a champion a; Isak Vanlalhmangaiha, New Serchhip Badminton Club nen Tangkawpa U-19 Boys Doubles title an lak bakah H. Lalrinhlui, Chaltlang Badminton Club nen U-19 Mixed Doubles title an la te bawk.
Vanlalhruaia Sailo hi ITM Academy, Raipur-a training lai mek niin, TATA TRUSTS / NEIDA-te nen thawhhona kal zela training a ni a, kumin hi under 19 huanga a kum khatna niin, nakkum lamah pawh he huangah hian a la inlan thei dawn a ni.
Tun dinhmun a thlen theih chhan pakhat a club khelh mekna CTBC chungah lawmthu a sawi.
New Serchhip Badminton Club player Lalruatkimi pawh a telna category zawng zawng-ah champion velin a triple crown ve bawk.
U-13 leh U-11 Girls Singles title a lak bakah Rosalyn Remlalmuani, Saron Badminton Club nena Tangdunin U-13 Girls Doubles title an la bawk.
Lalruatkimi hi coach Tluanga’n Serchhipah a enkawl mek a; a fanu hlawhtlin zelna kawngah a pa Lalremruata’n an club NSBC leh Tluanga chungah lawmthu a sawi.
H. Lalrinhlui, Chaltlang Badminton Club chuan U-19 Mixed Doubles title a lak bak ah Girls Singles U-19 title a la tel a; Lalruattluanga Tlau, NSBC chuan U-17 Boys Singles leh Boys Doubles title lain, category hnihah a champion thei bawk.
Zoramthari, Sihphir Badminton Club chuan U-17 Girls Singles title a la a, U-19 Mix Double leh U-19 Girls Single-ah erawh runner-up a ni thung.
Under-15-hmeichhiaah T. Lalmuanpuii, Chhinga Veng Badminton Club-in rorelin, Girls Singles-ah a champion a, Girls Doubles ah LalThakimi, NSBC nen an champion bawk.
Under 15 Boys lamah K. Liansangzela, CTBC hneh thei an awm lo a, Singles leh Doubles-ah a champion a; Doubles-ah hian V. Lalhmingmuanpuia, CTBC nena inkawpin an champion bawk a ni.
Under-13 lamah Mark C. Lalrinsanga, Saron Veng Badminton Club chu boys singles-ah champin a; Lalmalsawma Lianhna leh Zothanpuia Chhangte, MVBA-te’n Boys’ Doubles title an la a ni.
Under-11 boys singles-ah Mark C. Lalrinsanga, Saron Veng Badminton Club a champion bawk.
He tournament hi Mizoram badminton tana hma lam hun thlirna pawimawh tak niin, player naupang zawkte’n coaching regular taka an kalin rah Tha a chhuah mek zel niin a lang.
Chaltlang Badminton Club leh New Serchhip Badminton Club player-te category pasarih ve veah an champion thei a ni.
He tornament hlawhtlina atana sponsor-tute zawng zawng, a bik takin main sponsor PC Lallawmsangate chungah MBA chuan lawmthu a sawi a; Zonet-in TV leh Youtube lama an live sak avangin lawmthu an sawi tak meuh bawk a; MSSC-te nena thawhhona avanga tun tournament pawh hi buatsaih thei an nih avangin MBA chuan MSSC chungah lawmthu an sawi bawk.