Season tawpa a chhuah tur thu leh Real Madrid lama a kal tur thu a nemngheh hnua a league game khelh leh vawikhatnaah Kylian Mbappe chuan a chhuahsan tur Paris St-Germain tan goal a khung zo lo mai ni loin Princes Park-ah hun tawp hmaa lakchhuah a ni a, mikhual Rennes nen sikhat ve ve thunin an inhnehtawk ringawt!
Goal 21 nei tawh chunga Ligue 1 top scorer ni mek Mbappe a lakchhuah chungchangah PSG boss Luis Enrique chuan Kylian Mbappe tel loa inkhelh an lo zir tan a ngaih thu a sawi!
Tarlan tawh angin, France international hian kumin nipui thawt rualin Bernabeu club a pan tawh dawn a; Pathianni zan inkhelah an kawtkaia PSG tlawm thei dinhmuna an din lai, sikhat an phurh tawh hnu, second half tir lam minute 65-ah lakchhuah a ni.
Enrique chuan, “A tlai emaw a hma emaw min chhuahsan hun a la thleng ngei dawn a, Kylian tel loa kan lo inkhelh tan zeuh zeuh hi a ngai tawh a ni. Fuh leh tha dawn awma ka ngaih chuan ka khelhtirin, ka khelh lohtir mai tur a ni a, chu chu an player-te chunga coach zawng zawng tihdan a ni.
“Season tharah pawh hian inelna tak tak pawh phak leh ka duh dawn a, he PSG team-a bul tan pha player tawh phawt hi chuan inkhelhna hmun chan hi hun remchang ropui takah ngai vek se ka duh a, chu chu tun season bakah season thar atana ka hawi lam tur a ni,” a ti.
Pathianni inkhelah khan minute 33-naa Amine Gouiri goal hmangin Rennes lamin rin loh takin hma an hruai a, he goal khat hi mikhual lamin chakpui zui thei mai dawna an lan hnu hun pekbelh minute sarihna a kal mek laiin Goncalo Ramos chuan penalty chhuihlutin Ligue 1 hmahruaitu team tlawm tur a chhan thei hram a ni!
PSG hi an league match khelh hnuhnung 18-ah an tlawm lo fai vek a; khelh 23-a point 54 hum chungin anmahni hnaihbertu Brest lakah point 11-in an sang tawh a; Rennes pawh chesawn loin pasarihnaah an la thu chhunzawm thei hram hram.
Mbappe ‘nil’ zana chak zo lo PSG
