Mbappe zara chak ni hmel hmu leh ta Real Madrid!

Mbappe zara chak ni hmel hmu leh ta Real Madrid!
Spanish La Liga bika game thum chhung zet hnehna chang zo tawh lo Real Madrid chuan Nilaini khan Kylian Mbappe goal hnih leh Eduardo Camavinga goal khat tihluh hmangin Athletic Club mualah hnehna an lawm ve leh thei ta hram!
Estadio de San Mames khelmuala mipui 51,313 pungkhawm hmaah chak mamawh Los Blancos tan France captain Mbappe chuan minute sarih an khelh tlin rualin mikhual hmahruaina goal a thun er zawk!
Real goal khatna a chhawpsak hnu lawkah Trent Alexander-Arnold kha hliam avangin lakchhuah a ni a; hliam (hamstring injury) avanga a chawlh vang vang hnua khelmual a luh leh vawi khatnaah ke lam na avang bawkin a talbuai zui leh ta a ni.
Tun kha kumin nipui thawt laia Liverpool chhuahsana Spain a pan hnua a club thar tana assist vawi khat a siamchhuahna niin, Real Madrid tana La Liga game vawi nga chiah la start English player hi Bernabeu club-ah beisei angin a la arh chhuak zo lo!
Chawlhlawk dawnah Mbappe siamsak atangin Camavinga chuan Xabi Alonso team goal hnihna khungin, half time-ah mikhual lamin sihnih faiin hma an hruai phawt.
Darkar khat an khelh tlin hma lawkin Mbappe chuan he match-a a goal hnihna leh sithum faia Real chakna goal ni zui ta chu Alvaro Carreras chhawpsak atangin Athletic Club goalkeeper Unai Simon ven goal-ah a tilut leh a; season kal laia a league goal 16-na hmangin Madrid-in game an pumhmawm ta a tih theih a, darkar chanve zet inkhelhna hun la awm mah se chak zawk tur a chiang tawh!
Season kal lai league khelh 15-a goal 16 thun tling Frenchman Mbappe dawta La Liga lama goal thun tam ber ni mek chu Barcelona striker Robert Lewandowski niin, Pole palian hi La Liga scoring chart-ah pahnihna a ni mek.
An mikhualna hmun atanga an point thum hlawhchhuah hmangin Real chuan league khelh 15 atangin point 36 an khawl tling ta a, Spanish La Liga table-ah pahnihna luah chhunzawm mah se hmahruaitu Barcelona laka an hniamna chu point khat lek a ni ta.
Thla hmasa mai kha chuan Real Madrid hian a zawna draw vawi nga nei chung pawhin point nga ngawt khan table-ah hma an la hruai fal thei a; an hmahruaina hloh zui ta mah se Catalan-ho mawngphe hmu pha tur zawnga hnehna an chan chhoh leh chungchangah coach Alonso a hlim hle!
Real Madrid manager Xabi Alonso chuan inkhelh ban press conference-ah an chechhe kal tluang lai thlaha hnehna an chan lehna game kha an tan a pawimawh hle tih sawi chungin, “Kan mamawh tak inbuatsaihna nei chung leh chi-ai hlek lo, dam dapin khelmual kan lut a, kan naute’n complete match an tih ang chiah chiah kha an khel chhuak thei a, khati ang tak khan kan khel chho zel tawh tur a ni ang,” tiin a naute a fuih zui nghal.
Alonso team hian Pathianni league match-ah Celta Vigo hmachhawn lehin, karleh Nilaini Champions League ngaihven hlawhah Santiago Bernabeu an lut zui leh ang a, tah chuan English palian Manchester City an mikhual dawn a ni.
Nilainia tlawm leh ta Athletic Club chetchhiat a kal tluang zel thung a; tun kha league game 12 an khelha an vawi sarih chak lohna ni tawhin, point 20 an hmuh ve tawh nen table-ah pariatna bak an la pel zo lo.