AMC inthlana hman tur EVM
thlanchhuah /semdarh ti tan
April 21-a Aizawl Municipal Corporation inthlanpui neih huna hman tur electronic voting machine chu thlanchhuaha semdarh tan a ni.
District Municipal election officer Aizawl Er Lalhriatpuia kaihhruaia EVM final randomization chu Nilaini khan neih a ni a. AMC 2026 inthlanpui atana general observer atana ruat – Transport additional secretary R Lalchanhima, GAD additional secretary Irene Zohlimpuii, Agriculture & Farmers Welfare additional secretary Lalnunhlua, School Education director Angela Zothanpuii bakah recognized political party – INC, BJP, MNF leh ZPM aiawh an tel a ni.
Election thianghlim leh langtlang a awm theihnan polling station tina hman tur EVM hi computer hmanga thlanchhuah/ semdarh (randomized) thin a ni a. EVM engineer-ten EVM an check vek hnua, AMC inthlan atana hman tlak nia pawm, an thlan chhuah Balloting Unit-359 leh Control Unit-352 chu 1st randomization-ah AMC Ward 19-a hman tura, reserve 5% tiamin, computer hmanga semdarh (randomized) a ni. 2nd Randomization-ah BU leh CU inkawp tur thlanchhuah (randomized) leh a ni a. Final randomization-ah Ward tin tana EVM thlanchhuah (randomized) tawh chu ward chhunga polling station tinah semdarh leh a ni.
AMC hnuaiah hian Ward 19 awmin, local council 89 an awm a, polling station 264 an awm mek. Tun tum AMC inthlanah hian VVPAT (Voter Verifiable Paper Audit Trail) erawh hman a ni dawn lo.
MC inthlana hman tur EVM thlanchhuah /semdarh ti tan
