Daily Newspaper

MC Marry Kom a chak lo

16

Tokyo Olympic-ah India in medal lak a beisei sanna pakhat chu tihthlawnin a awm leh ta a. Indian boxer chhuanvawr MC Marry Kom chu Colombia boxer Ingrit Valencia lakah a tlawm a. A vawihnih nan Olympic medal hlawhchhuah a beiseina a tawp.

Manipur nula Marry Kom hian bul a tan tha tawk lova, round khatnaah judge pakhat chiahin a chaktir a; endiktu pali ngawtin Ingrit Valencia hi chak zawkah an puang. Second round-ah chak let ngei tumin thapui a thawh a, a khingpui a nawr nasa viau. First round aiin a chetha hret. Second round-ah hian endiktu pahnihin point an pe sang zawk a, pathumin Valencia an la chaktir zawk cheu.

Round hmasa pahnihah hnufual zawkah a tan ve ve vangin Marry Kom dinhmun a tha lo hle a, hnehna chang turin round thumnaah a khingpui hnek tluk a mamawh. Inhnek hmuhnawm lantir chhunzawm in, an inhnehtawk leh viau a, Manipur nula game kang hret mahse a khingpui a lehthal zo chuang lo. Round thumnaah hian endiktu pahnihin point an pe tam zawk a, endiktu pathumin Colombian Valencia an chaktir zawk leh cheu a. Split decision hmanga tlawm zawkin, Marry Kom chu uiawm takin tlawm zawkah a tang ta a ni.

Kum 38 zeta upa ni tawh mahse hmeichhe boxer ropui MC Marry Kom hian inhnek chawlhsan a la tum loh thu a sawi a, tha taka a la inlan zui theih a beisei. Olympic-ah erawh chuan a inlan a beiseiawm tawh lo thung a. Tokyo Olympic-ah flag kenga India team a hruaitu Kom nula hian Olympic a thlah fel nghala ngaih a ni thung.

Olympic medal pahnih lak a tumna puitlin zo lo mahse MC Marry Kom hi hmeichhe boxer ropui ber zinga ngaih a ni thung. Khawvel huapah vawi ruk ngawt a champion tawh a, London Olymic 2012 khan Bronze medal a hlawhchhuak bawk. Asian Games leh Commonwealth Games vawikhat ve ve Gold Medal a hlawhchhuak a, Asian Championship-ah vawinga ngawt a champion tawh bawk. Boxer ropui, India tihmingthatu a nih vang hian India rama rorelna khawl sang ber Rajya Sabha-ah MP a ni mek nghe nghe.

Marry Kom a tlawm lai hian India mipa boxer Satish Kumar chuan split decision Jamaima boxer Ricardo Brown hneh in, quarter-final a lut ve thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy