Merchant’s Chamber of Commerce & Industry (MCCI) chuan January 5 khan Kolkata-a an Conference Hall-ah Mizoram chief minister Lalduhoma chawimawina leh amah kawmna an buatsaih.
Chief minister chuan MCCI-in chawimawina an hlan avangin lawmthu a sawi a. A kaihhruai sawrkarin kalphung thar policy a neih thu te, eirukna tel loa sawrkarna kalpui an tum dan, ni 100 chunga hmalakna tur an duan thu leh a kaihhruai sawrkarin ruahmanna a neih tlangpui a hrilh. Mizoram chu amah maia dingchhuak thei a ni bik loa, sawrkar laipui leh mimal enkawl industry hmun hrang hrang amite nena awmze neia hma lak ho a mamawh, tiin, industry neitute chu Mizorama hmalakna kalpui turin a sawm.
Hma an la duh a nih chuan engtik lai pawhin amah emaw an hmalakna tur kaihhnawih minister leh department thuneitute emaw state pawna Mizoram House chu an bepawp thei tih a hrilh a. Chutihlaiin sawrkar policy leh scheme thenkhat hmanga sum zawn nan maia Mizoram hman tumte tan chuan hmun a awm lo tih a hrilh a ni.
MCCI member-te hian hotel, steel, edible oil leh animal feed bakah entreprenuership lama Mizorama hma la duh an awm thu chief minister hi an hrilh a ni.
MCCI-in CM lawmpuina siam
