MPSC hnuaia Mizoram Civil Services (Combined Competitive) Examinations-2025 result chu puan zar a nih atanga a ni 8-naah siam that a ngai tih hmuh chhuah a ni a. Nimin khan MPSC chuan press note tichhuakin he thil thleng hi a puangzar a. MCSE-2025 result chugchangah Mizoram sawrkara recommendation thehluh tum a nih mek laiin result kaihhnawihah thil thleng thar —candidate zinga pakhat, technical ground-in a tling lo tih hmuh chhuah a ni a. Result hi ennawn a, siam thatna tihchhuah a nih veleh result thar hian ni 9-2-2026-a final result lo tarchhuah tawh chu a thiat/sut nghal dawn a ni.
Thil dik lo a awm a, a tlai lutuk hmaa hmuh chhuah a ni hlauh hi a lawmawm e. Tu te pawhin fel famkim hi kan duh em em ang; mahse, chu chu Siamtu quality a ni a, mihringten kan chuh thei lova, kan chang pha hek lo.
Tihsual hi mihring chan a ni, kan ti thin a, a dik viau. Chutih rual erawh chuan, Mizoram zahawmna kengtu ber pakhat, ngaihngam taka mipui innghah ngamna nia ngaih thin MPSC hian tun hnuah chuan mitsir a tawk zui deuh maithei e. Tunhmain hetiang thil hi (MPSC kan neih hnuah) a lo thleng tawh reng em tih hi hriat mai theih a ni lova, a lo thleng tawh a nih phei chuan, tanlak kan ngai viau tihna a ni mai.
Tuna result siam that a ngaih chhan hi technical ground tih a ni a, mipui lam chuan a eng ber technical nge ni ang tih chu puanzar a nih hma chuan kan inrinsiak vel mai mai a ngai rih dawn tihna a ni a. Certificate chiangkuang vak lo nge, marksheet dik lo nge, bona fide resident lam nge, certificate nge, eng nge? kan hre lo. Kan hriat chu ‘technical ground’ tih zawng a ni.
Certificate lem chungchangah kum 2023-24 chhung khan thil serious deuh a thleng tawh a. Kan hriat angin, National Health Mission hnuaia thawk tur laknaah ha doctor (dentist) nia inchhal mi pakhat chu kum khat chuang zet damdawi ina a thawh hnuah document lem a hmang tih hriatchhuah a ni leh si a, bantir a ni a. Ha lam enkawl thiam nih tuma zir chu a ni ve ngei ang a, mahse a zirchhuak zo lo va, document lem a hmang ta mai a nih a rinawm ber a. Chutiang mi chuan kum khat chuang damlo engemawzat a lo enkawl hman tawh a, a damlo enkawlte dinhmun chu a ngaihtuahawm viau awm e. Document lem a hmang tih an hmuchhuak tlai hle a ni.
Enfiah ngai, finfiah ngai hi a tam ta hle mai a. Tun lai thiamna a sang tawh a, fimkhur a ngai lehzual tih a hriat reng mai. Tuna thil thleng hi, tun hnua hetiang thil a thlen ngai tawh lohna tura fimkhur phah nana hman a, hlawkpui nana hman thiam hi a tha mai a. MPSC hnuaia thawkte hi mi pangngai chunglam an ni a, tun thil thleng hi fimkhur phah nan an hmang ngei dawn tih a hriat mai awm e.
MCSE-2025 Result siam \hat ngai hi…
