MCVU-in lungawiloh lantirin vawiinah lirthei din tir dawn

Mizoram sawrkarin tuialhthei man a tih san avang leh kawng chhiat rei lutuk avangin Mizoram Commercial Vehicle Union chuan vawiin – October 23 zing dar 6.00 atanga tlai dar 6.00 inkar hian lungawi loh lantirin lirthei an din tir dawn. Mizoram Commercial Vehicle Union (MCVU) hruaitute sawi danin, hun hmasa lamah lungawi loh lantir hi tiamchin awm lo, ti tawh mah se, YMA rorel inkhawm a awm dawn avang leh kohhran inkhawmpui programme a awm avangin ni khat din nise, an ti leh ta zawk tih an sawi a. A tirah Union hnuaia awm lirtheia eizawng pawl 11 chu lungrual takin an thawk hoa; tun tumah erawh service tuma thutlukna siam ta Aizawl Two Wheeler Taxi Association tih loh chu an la inlungrual tih an sawi a ni.
Mizoram pumah kawng a chhia a, lirtheia eizawngte a nghawng na em em a, kawng chhiaah an lirthei a tangin a tlu a, inhnuhchhuahna’n leh lirthei chhe siamna’n cheng tam tak an seng a, hmun tam takah an service thei lo hial a, chutianga dinhmun harsa taka an awm laia sawrkarin oil man a tisang vak mai chu a hun an ti lo tih an sawi.
Mizoram sawrkarin rate thar a siam ang chuan, petrol-ah Rs. 5.56 leh diesel-ah Rs.7.76-in a pung tih MCVU hruaitute hian an sawi a. Chhiah lak leh oil man tihpun chu an do ngawr ngawr loa, vawileh khata a pung vak mai chu an hrethiam loa, thil man zawng zawng a tih to tur leh mipuia a nghawng tur thlirin, chief minister pawh vawi thum an hmu tih an sawi.
NGO Coordination Committee-in diesel leh petrol man hi Rs.3 ve vea dil hniam theih an inrin avang leh an thu leh hla ngaichang tura an ngen avangin an hun tiam an tawlh ta zawk tih an sawi bawk.
‘Oil man to hian lirtheia eizawngte chauh a nghawng loa, chhungkaw tin min nghawng a ni. Oil man a to chuan bungraw phurh man a sang lo thei loa, in sakna bungrua leh ei leh bar phurh man a sang dawn. Hemi ngaihtuah chunga lungawi lohna lantir kan ni tih min hriatpui a, min thlawp turin mipui kan ngen a ni,’ an ti.
MCVU hruaitute chuan tuna lungawilohna an lantir avang hian sawrkar tawlh duh lo ta se, engti anga hma lak nge an tum tih zawhna chhangin, lirthei rate man chu State Transport Authority ruahman a ni a, nawr san chu an duh rualin, STA ennawn nghak hman loa, hloh ngawta tlan aia an lo hmanhmawh deuh hlek a nih pawhin mipui hriatthiamna an ngen tih an sawi a ni.
Sawrkarin kawng siamna atan oil litre khatah Rs.2 zel lak a tum chu a taka hman a nih chuan, kawng that leh that loh thu ah an thikthu a chhe hle tawh dawn tih an sawi bawk.