Daily Newspaper

Media hmangin Krismas leh Kumthar

13

Krismas leh kumthar lawmna hun hi Mizote nghahhlelh leh thlakhlelh a ni a, hrilengin a tihbuai avangin 2020 Krismas leh 2021 lawmna hun erawh kum dang anga hman theih a ni lo. Mizo Kristiante’n media hmangin hun an hmang a, kohhrante’n media hmangin hunpui hmanna hun an buatsaih hlawm.

“Hrilengin min nghawng a, mipui punkhawm te a theih loh avangin kohhran hrang hrangin media kan hmang tangkai a, media hmanga inkhawm kan buatsaihte kha thil lawmawm tak a ni,” Mizoram Kohhran Hruaitute Committee (MKHC) general secretary Rev R Lalrinsanga chuan a ti.

TV channel lamin thuchah sawina hun an siam a, kohhran hrang hrangte’n a indawtin hun an inhman chhawk. TV lam hian mi dang nena thawkhovin zaihona hun te pawh an buatsaih bawk.

Kohhran hrang hrangin an kohhran member-te en atan youtube lamah inkhawm programme an buatsaih bawk a, khawpuiah chuan Krismas programme leh December ni 31 zan inkhawm programme an siam hlawm.

MKHC general secretary Rev R Lalrinsanga chuan kohhrante’n media hmanga hun an hmang chu lawmawm a tih thu a sawi a, “Media hi hman tangkai a ngai a, media kan hmang tangkai thiam khawpin ka hria,” a ti.

Kohhran mipui pawhin an ngaihlu nia a hriat thu leh an hlawkpui a beisei thu a sawi a, “A pangngai kha chu a tluk lo ang a, mahse kohhran mipui hian an ngaihluin ka hria. Comment kan dawnah pawh thil lawmawm tak tak sawi tur a tam a, kan hlawkpuiin ka hria,” a ti.

Kum liam taah khan Covid-19 vangin Kristiante hun pawimawh Good Friday, Easter Sunday leh Tumkau Ni te pawh Mizoram kohhrante’n kum dang angin an lo hmang thei lo tawh a, hmun hrang hrangah media hmanga hun hman a lo ni tawh.

2020 Tumkau Ni-ah khan khua leh veng hrang hrangah mahni khua leh veng huapin aurinna hmanga inkaihruaiin Mizo Kristiante’n hun an lo hmang tawh a, tumkau kengin mipui an au a nih kha. Krismas leh kumthar lawmna hun pawh hmun thenkhatah chuan aurinna hmanga inkaihruaiin hun an hmang a, thuchah te pawh an sawi.

Kum a thar a, kohhran mipuite an la inkhawm thei lo. Inkhawm theih hun tur hi hriat a ni rih lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy