District Hospital Siaha chu medical college-a hlankai a nih theihna turin ‘recommendation’ a pe dawn tih Union minister of state for Health & Family Welfare Prof. SP Singh Baghel chuan a sawi.
tlawhtu Union MoS hian Ningani khan District Hospital Siaha tlawhin, a hmunhma bakah room hrang hrang a fang a. Hospital hotuten harsatna an sawite a ngaihthlak sak. An harsatna tawh chu a hmalama chingfel turin hma a lak tur thu sawiin, dialysis khawl an mamawh hle tih an lo thlen chu, khawl pakhat a pek nghal tur thu a sawi.
India hmarchhaka chengte tan medical college tam zawk din a tul takzet tih sawiin, North East-a medical college tam zawk din a nih theihnan ngaihnathiamna (relaxation) sang zawk pe tura hma lak a tum thu a sawi. A bikin District Hospital Siaha chu medical college-a hlankai a nih theihna turin ‘recommendation’ a pe dawn tih a sawi a ni.
Siahatlaa Health & Wellness Centre (Arogya Mandir) a tlawh nghal a. Mipui tana rawngbawlna pawimawh tak thawktu an nihna hrereng turin Prof. SP Singh Baghel hian thawktute a chah. Accredited Social Health Activist (ASHA) te pawh kawmin Pradhan Mantri Jan Arogya Yojna (PM-JAY) hnuaia hamthatna awm ang ang chu ASHA-ten an tel thuai tur thu a sawi.
Union MoS hian Ningani khan Siaha atang hian helicopter-in Lengpui Airport a pan a, Delhi panin a haw a ni.
Medical college atan Siaha damdawi in ka rawt dawn – Union MoS for Health
