Daily Newspaper

Medical doc-te khawih ang Ayurveda zirte khawih ve phalsak; Medical leh dental doctor-ten ram pumah dodalna lantir mek

17

Aizawl, December 12 : Modern medicine zira medical doctor ni ta ten an khawih ang hrang hrang, inzai (operation) thlengin India ram damdawi siamchhuahte zira ayurveda lama thiamna neite chu khawih (practice) ve phalsakna chu tunhnai khan India sawrkar laipui chuan a tichhuak a. Hei hi Indian Medical Association chuan duh loin ram pumah a dodal mek.

Indian Medical Association leh Indian Dental Association Mizoram State Branch hruaitute sawi danin, India rama modern medicine – education & profession hi Medical Council of India (MCI) chuan a enkawl a, modern medicine ni lo thiamna dang nena chawhpawlh a nih lohnan a humhalh that thin. MCI hi a pawimawh em avang hian mawhphurhna changtute pawh a chanve aia tam chu thlanchhuah niin, state hrang hrangin aiawh an nei a. Mizoram pawhin a aiawh tur a thlang thin a ni.

Sawrkar laipui chuan tunhnaiah MCI hi titawpin a aiah National Medical Commission (NMC) a din a. NMC kaihruaitu turte pawh thlan ni tawh loin ruat member an ni. Chu chuan harsatna a thlen thei tih hriain, IMA hian rei tak chhung a lo do tawh a, mahse a do hneh lo a, 2020 September 25 atang khan MCI tihtawp niin NMC din a ni.

India ramah hian modern medicine ni lo, Indian System of Medicine hi a kal ve reng a, a enkawltu bik Central Council of Indian Medicine (CCIM) pawh 1971 khan Indian Medicine Central Council Act hnuaiah din a ni a. MCI a din lai chuan heng thiamna inanglote hi chawhpawlh a ni ngai lo a, anmahni thiamna zawnah an kalhrang a, a mamawhtute pawhin duh an thlang mai zawk thin tih an sawi a ni.

Tunhnaiah modern medicine kalphung tibuai thei India sawrkarin thutlukna a siam ta nual tih sawiin, IMA-in a ngaimawh leh tha lo a tihzualte zingah NMC Act hriattirna tihchhuah chuan medical doctor ni ve lote tan primary health care-ah medicine practice thei tura licence pek theihna dan a siam thu te; chu’ng mite chu ‘community health providers’ tiin nihna a pek thu te; laboratory technician atanga optometrist-te thlenga an nih thei dawn thu te a sawi. “Natna chi hrang hrang enkawl theihna – ICU, critical care, operation theater, labour room leh emergency-ah te thlengin enkawl phalna a pe dawn a ni,” an ti.

National Education Policy a siamthar hmangin, dedicated health universities-te tibo in, medical course hrang hranga luh theih dan kawng sawrkar laipui chuan a hawng dawn tih IMA hruaitute an sawi a. “Medical zirbingna leh thiamna chawhchawrawi a ni tawh anga, thiamna dik leh famkim neilo doctor a hringchhuak ang. Chu tak chu ‘Crosspathy’ kan ti a, damlo tan a pawi thei hle dawn a ni,” an ti.

National Commission for Allied and Health Care Bill 2020 pass hmangin, paramedic-te tan medical practice theihna tur kawng a hawnsak tak thu pawh an sawi.

CCIM hriattirna tihchhuah tharah phei chuan, AYUSH hnuaia ayurveda graduate-te, post graduate zirte tan surgery course an zir phalna a pe leh tawh tih an sawi. “Hengah te phei chuan general surgery, ENT leh ophthlamology line an zir a phal dawn a. Surgery thiamna nei ve lo te tana tih mai mai chi loh damlo zai – mit paih (cholecystectomy), vun bel (skin grafting), pumpui pawp zai, rilphir zai, tilmu paih leh a dang tam tak bakah, eye surgeon-te tan lo chuan zai mai mai loh chi – cataract surgery leh intraocular lens vuah te, ENT surgeon-te lo chuan an zai mai mai chi loh – hnar ngul kawi siamthat te, beng dar chhia siamthatte, tonsil paihte zirtir a tum a. Hei mai bakah hian dental surgeon-te lo chuan khawih chi loh – Root Canal Treatment te thlengin an zir theih nan kawng hawn a tum a ni,” tiin, sawrkar laipui hmalakna chu hlauhawm an tih thu an sawi.

A hminga training kum hnih vel neiin, a basic tak taka zir awm si lo, taksa bung hrang hrang, mit leh ha lam enkawl leh khawih theihna chi hrang hrang, an niin a hranpa theuha an lo zir leh an khawih chu, he ruahmanna thar hnuaiah chuan, bawm khata dah vek a ni dawn ta tihna a ni, tiin, “Keini leh kan fate chuan kan tuar lo maithei, a tuartu tur chu mipui nawlpui an ni dawn a ni,” IMA hruaitute chuan an ti.

Heng hmalaknate hi IMA Hqrs chuan a him lohzia leh mipuite tan a pawi theih zia hriain, heti zawnga sawrkar laipui hmalakna hi tihtawp a nih theih nan India ram pumah lungawi lohna a lantir mek tih an sawi a. December 8 khan demonstration neih a ni tawh a, December 11 hian inentirna hmunah, non-essential non-covid health services te chu zing dar 6.00 atanga tlai dar 6.00 inkar an khar vek thu te an sawi a. Mizoramah erawh hetiang zawnga hma la lo hian, IMA member zawng zawng, district hrang hrang amiten lungawilohna lantir nan badge dum an bel nileng tih an sawi. He hmalaknaah hian IMA leh IDA Mizoram Branch chu an inthlawp tlat tih an sawi bawk.

Epaper Subscribe Now

Get real time updates directly on you device, subscribe now.

1 Comment
  1. Thudik tantu says

    “CCIM hriattirna tihchhuah tharah phei chuan, AYUSH hnuaia ayurveda graduate-te, post graduate zirte tan surgery course an zir phalna a pe leh tawh tih an sawi”. FAKE NEWS hi thehdarh loh a tha aw. Ayurveda (BAMS) zir ngei ka ni a, he in thil ziah hian rilru a ti na angreng, thudik chu nise engmah sawi tur a awm lo. Mahse maw, BAMS hian an graduate hnu ah surgery an zir tan lo a, Undergraduate BAMS Final year ah Surgery subject hi an zir na a DAIH TAWH . Chuan chumi hnu ah PG ah kum 3 dang a la zir leh theih, chuan minor surgery te an ti theih na a rei tawh. Tuna dan thar hnuaiah Surgery tam tak hi BAMS pass out nazawngin an ti dawn lo bawk, Surgery specialist chauh in an ti thei dawn bawk. Chu pawh kum 3 pg an zir hnuah kum2 an neih leh hnu a ti thei an ni dawn. He dan an tihchhuah nachhan pawh India rama doctor (surgeon) in daih loh lutuk vang a ni. Mahni ei bel humhalh duh avanga “Mixopathy” tih vel IMA chhuanlam ngawt hi a ni lo.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy