Mizoram Environment & Forest Consultative Forum (MEFCOF) chuan ramngawi – Zotheihuan siam kawnga hma la thate leh environment humhalh kawnga thawhhlawkte a chawimawi.
Zirtawpni khan MEFCOF hian Aizawlah general assembly an hmang a. MEFCOF hmalaknaa ramngaw leh nungcha humhalhna hmun (ram reserve) – Zotheihuan 170 awm zinga enkawl tha ber khaw 7 hnenah lawmman leh sumfai an hlan. Pakhatna – Lalluaia Zotheihuan Reiek hnenah Rs. 30000, pahnihna – Liana Zotheihuan Neihdawn Rs. 20000, pathumna – Kanghmun Zotheihuan Rs. 10000 hlan an ni a, citation an hlan theuh bawk. Zotheihuan pali hnenah consulation prize hlan a ni bawk.
Mizo zinga environmentalist entawn tlak an tih mi pali – Bawihchhingpuii, Zotheihuan bultantu; Romalsawma Hmar (Roma), Zira Pc leh Vanramchhuangi (Ruatfela Nu) hnenah chawimawina an hlan a ni.
Hmanpuitu Environment, Forest & CC minister Lalthansanga chuan, ram leh mipui nun khawchhuahna atan leh hmasawn zelna atan ramngaw leh nungcha humhalh a pawimawh tih a sawi a. Hemi kawnga MEFCOF-in hun rei tak atanga rim tak leh mahni sum senga ramngaw an humhalh chu fakawm tiin, “Ram tana rohlu an chher chhuak takzet a ni,” a ti. Sawrkar nena thawhho tha nei zel turin a sawm.
MEFCOF-in thawhhlawkte chawimawi
