Megan Thee Stallion-i’n rimawi chawlhsan rih dawn
Rapper Megan Thee Stallion chuan ama taksa leh rilru lam hriselna lama insawrbing a duh avangin rimawi a chawlhsan rih dawn niin InStyle magazine chuan an tarlang a, “Tun aia tha zawka ka awm hunah fans lam chuan music thar an beisei thei ang. Tunah chuan damna lamah ka insawrbing rih dawn a ni,” a ti.
Megan Thee Stallion chuan music leh entertainment industry chu a hahthlakin innek deuh salh salh te poawh a tam ve thin niin a sawi a, chuvang chuan rilru leh taksa lama chauh thawngkhawngna a thlen hma a chawlh hahdam thiam a pawimawh niin a sawi a, “Nun hi a inbuk tawk taka kan hman thiam a ngai a ni,” a ti bawk.
Megan Thee Stallion hi rimawi khawvela a intah luhna leh a lar chhuahna a la rei lo a, 2022-am a album ‘Traumazine’ pawh kha a album pahnihna a la ni chauh a, he album hi Billboard 200 chart-ah No.4 a kai a, he album-a a hla Dua Lipa a zaipuina ‘Sweetest pie’, ‘Plan B,’ ‘Pressurelicious’ featuring Fuiture, ‘Her’ leh ‘Unregratful’ te pawh a hit viau a ni.
Megan Thee Stallion hi 2020 khan rapper dang Tory Lanez-a’n a ke-ah a kah sak a, he case kal zelah hian nikum December khan case chi thum- semiautomatic ralthuam hmanga midang bei; lirtheia silai register loh a mu awm kawl leh fimkhur loh vanga silai hmetpuak-ah te Lanez hi thiam loh chantir a lo ni tawh.
He trial an neih lai hian Megan pawhin tap chungin thu a lo sawi tawh a, he case avanga mite sawiselna a tawh zozai te chuan amah an tihhrehawm zia sawiin, “Hetiang khawpa hrehawm hi ka tuar dawn tih hre lo hre lawk ila chuan min lo kap hlum zawk law law se tih te ka duh hial a ni,” a ti.
Megan Thee Stallion-i’n rimawi chawlhsan rih dawn
