Union cabinet chuan Mawlyngkhung, Meghalaya leh Panchgram, Assam inkar kawng km 166.80-a thui tihchangtlunna tur, Rs veibelchhe 22,864 senna tur chu an pawm.
Sorkarin thuchhuah a siamah chuan he kawng siam tur NH-6 hi Meghalaya-ah km 144.80 kalin Assam-ah km 22 a kal dawn tih an tar lang.
“Prime Minister Narendra Modi-a kaihhruai Cabinet Committee on Economic Affairs, chuan Nilaini khan National Highway No 06 Mawlyngkhung (Shillong bul), Meghalaya leh Panchgram (Silchar bul), Assam inkar kawngpui tihchangtlun, enkawl leh lirthei a ruala pali tlan theihna tura km 166.80-a thui siam tur, Rs vaibelchhe 22,864 senna tur a pawm,” an ti.
He kawngpui siam thar tur hian Guwahati leh Silchar inkar inkalpawh a tiawlsam sawt dawn tih an tar lang bawk.
“He thil hian Tripura, Mizoram, Manipur leh Assam-a Barak Valley leh Guwahati inkalpawhna hun rei zawk leh hlat zawng a titawi dawn a ni,” an ti a, ram puma inpawhna titha zel tur a ni tih tar lan a ni bawk.
Assam leh Meghalaya inkar inpawhna a tihawlsam bakah hian eibar zawnna kawng, a bikin Meghalaya-a industry hmasawnna tur leh cement leh lungalhthei thar chhuahte pawh a tiawlsam dawn niin sawi a ni bawk.
Kawng thar hian Guwahati Airport, Shillong Airport leh Silchar Airport kal a tiawl sawt ang a. Hmarchhakah khualzin hipin khualzinna kawngah hlawkna a siam dawn tih an sawi bawk.
Meghalaya leh Assam inkar kawng km 166.80 siam tur pawm
