Thawhtanni khan Meghalaya leh Nagaland Assembly constituency 60 awma 59-ah ve ve inthlanna neih a ni a, State pahniha voter 34 lakh chuang te chuan candidate 552 atangin an duh an thlang chhuak a ni.
Meghalaya bikah candidate 369 an awm a, ruling National People’s Party (NPP) te chuan sorkar tha an kalpui tia insawiin tun inthlanah mamawh chin seat 30 lak theih an inbeisei a.
NPP te hian an thawhpui reng thin seat 56 chuh BJP te bakah Congress te leh Meghalaya-a party thar Trinamool Congress (TMC) te chu an elpui ber tur te an ni a. Meghalaya-ah hian UDP candidate H.D.R> Lyngdoh chu a thih avangin East Khasi HIlls district a inthlan chu thulh a ni.
Meghalaya-ah hian Congress te chuan rorelna chan leh ngei tumin Constituency 60 ah candidate an nei vek bawk a.
Meghalaya-ah hian Assembly seat 60 awmah 36 chu Khasi, Jaintia Hills region ah awmin, 24 chu Garo Hills region-ah a awm thung a. Meghalaya BJP chief Ernest Mawrie chuan West Shillong constituency-ah dingin mipui tena an thlantlin leh a beisei thu a sawi.
Meghalaya Chief Minister Conrad Sangma chuan voter te phur dan a enin lawmawm a tih thu a sawi a. “Mipui tam tak vote thlak duh ngeiin an lokal a, hei hi democracy tana tha a ni a, tun anga voter te pur hi ka la hre ngai lova, kan tana tha a nih ngei ka beisei,” tiin a sawi.
Nagaland-ah chuan Congress party ten seat 25 an chuh a, Nationalist Democratic Progressive Party (NDPP) leh BJP te chuan kum 2018 a seat-sharing formula an hman 40:20 chu kalpui lehin an thawkho bawk a.
BJP te chuan February 10 khan seat khat la der tawhin Akuloto seat ah Kazheto Kinimi chu chuhtu a awm lo va, a khingpui tur Congress candidate Khekashe Sumi a inhnuhdawh avangin tlinga ngaih nghal a ni a. Kumin hian Nagaland chuan MLA a hmeichhia hmasa ber neih ngei tumin party tin ten hmeichhe candidate neiin pali lai an awm a ni.
Nagaland-ah hian Naga People’s Front (NPF) leh Congress te ro inrel chhawka kum 31 lai rorelna chang te chuan candidate tur an haihchham thung a, NPF te hian candidate 22 chauh neiin Congress ten 23 chauh an nei thei thung. Chutih laiin Lok Janshakti Party (Ram Vilas) te chuan candidate nei awlsam thungin an candidate te hi ruling Nationalist Democratic Progressive Party (NDPP) leh Bharatiya Janata Party a seat chang lo an ni fur thung.
Meghalaya leh Nagaland inthlang
