Meitei BJP MLA Singh-a’n Kuki relief camp tlawh

Meitei BJP MLA Singh-a’n Kuki relief camp tlawh
Manipur-a chi leh chi inkara buaina a chhuah atanga kum hnih chuang a liam hnu leh President’s Rule-a an awm mek hnua a vawi khat nan Meitei BJP MLA leh rural development minister hlui, Yumnam Khemchand Singh-a chuan tlangram district-a Kuki khaw pahnih a tlawh.
Singh-a’n Thawhtannia Kuki khua a tlawh hi Kristiante hunpui, Krismas lo thleng turah mipuia boruak tha siam tum leh hnam hnih inkar khi siam thatna tur atana a tih a ni.
Assembly speaker pawh lo ni tawh, Singh-a hi BJP Meitei MLA zinga Kuki relief camp tlawh hmasa ber a ni a. Infiam mi, politic-a lut zui ta, Imphal West-a Singjamei bialtu a ni.
Kuki khua a tlawhnaah hian a hmasa berin Sareikhong Baptist Church-ah kalin Ukhrul district-a Litan-a relief camp a tlawh leh a, tharum thawhna thleng avanga an in chhuahsana he hmuna awm mek Kuki-te a kawm.
Manipur-ah hian an in leh lo chhuahsan mi nuai khat chuang relief camp hrang hrangah an la awm a. Singh-a hian Kuki thingtlang khaw mite pawh kawmin an harsatna tawh leh kum hnih leh a chanve liam ta chhunga an hun tawnte a sawipui a, eng chi leh hnam tan pawh muanna awmtir leh chu thil tha ber a nih thu a hrilh hlawm.
Singh-a chuan khawvel hmun hrang hrangah buaina a awm reng a, heng hmunte ang bawk hian an state-a thil thleng chuan an kal zelna tur leh hmasawnna tur a dal lo tih a sawi.
“Krismas a lo thleng dawn a, kan state-a muanna a awm theih nan kan tawngtai a ngai a ni. Tuna buaina leh chetvel khuahkhirhna avang hian kan hmasawnna a kal thei lo va, kan chhuan naupang zawkte dinhmun hi chhe tak ni thei a ni mek a. Mi dang khua tlawh theih reng reng lova awm hi a tha lo hle a ni,” a ti.
“He buaina hian kan fate hma hun kan nghawngtir tur a ni lo va. Keini upa zawkte hian inrem lohna kan lo nei a nih pawhin kan state hmachhuan la ni tur kan fate hi kan ngaihtuah tel a ngai a ni,” a ti.
Singh-a chuan Kuki chenna a tlawh chu a mi mal ngaihtuahnaa ti mai a nih thu leh politic thila thang that lak nana ti a ni lo tih a sawi.
State BJP president, Tangkhul Naga hruaitu hlun tak ni bawk, Hopingson Shimray-a’n Singh-a hi a tawiawm a, Kuki khua an tlawh thei chu thil lawmawm tak a nih thu a sawi a. Singh-a chu BJP Meitei MLA zinga Kuki relief camp-a lut hmasa ber a nih thu a sawi bawk.
Tangkhul Naga hruaitu tho, ADC chairman hlui, Mark Luithing-a pawhin Singh-a hi an state hruaitu zingah May, 2023-a buaina a chhuah hnua lehlam lehlam mite kawm hmasa bertu a nih thu a sawi a. Myanmar ramri hrul, Kamjong district-a Chassad Kuki khua pawh a tlawh tih a sawi.
Tar lan tawh thin angin Manipur-a phaia cheng, Meitei leh tlangrama cheng, Kuki inkara buaina chhuakah hian mi 260 vel thi an awm tawh a. Kumin kum tira Chief Minister N Biren Singh-a a bân hnuah President’s Rule-in an awm mek a. Boruak tang zual reh tawh mah se hnam hnih hian inremna lam an la hawi hleithei lo a ni.