Manipur MLA rual 40 te chuan Prime Minister Narendra Modi hnenah lehkha thawnin Manipur-a remna leh muanna a awm theih nan ralthuam chi tin a ngai tiin an thlen.
Heng MLA-te hi Meitei te vek niin Kuki Group te nena Suspension of Operations (SoO) Agreement hnuhkir an ngiat bawk a, hei bakah hian State-ah National Register of Citizens (NRC) kalpui leh Autonomous District Councils (ADCs) tihchak an ngiat bawk.
Memorandum an theh luhah hian MLA rualte chuan Kuki grop tena ‘seperate administration’ an ngiat chu an dodal tlat thu an sawi bawk a.
“Security tha a awm theih nan tuna sipai dah te hi a tawk lo. Hmun thenkhata tharumthawhna te tihtawp a tul nghal rualin, tihlawhtling tak tak tur chuan ralthuam tun a ngai a ni. State pumah remna leh muanna boruak siam a nih theih nan ralthuam tun a ngai,” tiin PM hnena memorandum an thehluhah tarlan a ni a.
“Ralthuam tin te hel pawl te leh illegal armed foreign forces te leh State sorkar ta rukchhuah tinte mana chhuhsak vek a ngai a. He mi kawngah hian Central security forces te chuan nasa zawka hma lain remna tluantling a awm theih nan chet an lak a ngai a ni,” tiin an tarlang bawk a.
“|um tam tak loneitute hnathawka an kal laia hel pawl tena an kah a thleng zing lutuk a ni,” tiin memorandum-ah chuan tarlan a ni bawk a.
“Central Security Forces te awm lai ngei pawhin inkahna thleng fovin chung te chu a nihna tur anga chhanlet emawin a awm ngai lo,” tia sawi bawkin Assam Rifles (9, 22 leh 37) te chu tuna an awmna atanga sawnchhuah ni se ‘Central forces rintlak’ te leh State security te chuan remna leh muanna tichhe thei te an neutralise thei tiin an sawi bawk.
MLA rualte chuan Kuki militant group te inremna bawhchhe reng te nena SoO agreement chu tihtawp ni se an ti bawk a.
“State chhungah foreign mi leh sa tam tham tak leh an ralthuamte nena lut an awm reng a. Hengte hi Central forces tena an ven tur te an ni a. Tun hnai thla thum chhungin State/Central forces leh insurgent armed group te inbeihna tawp awm lovin a thleng reng a ni,” tiin memorandum-ah chan an tarlang bawk a. MLA rualte chuan State-ah NRC kalpui an ngiat bawk.
“Harsatna leh buaina hi tihtawp a nih theih nan politics hmanga chinfel ngai a ni. Duhthlan theih tur tam tak a awm a. Kawng khatah chuan Manipur indigenous mite him taka siamin chutih rual chuan rang thei ang bera NRC kalpui tur a ni bawk,” an ti a. “Immigranst te lakah Biometric registration kalpui tan a ni a, hei hi tihlena tihchak tur a ni,” tiin memorandum-ah chuan an tarlang bawk a.
MLA rual te chuan Kuki group tena ‘seperate administration’ an ngiat chu pawm theih loh engti kawng pawha rem lo tiin an sawi bawk a.
“Community tin te tan Autonomous District Council (ADC) tichakin hei bakah hian mumal taka kalpui thin loh Hill Area Committee (HAC) leh Autonomous District Councils (ADCs) paruk inthlan kalpui ni se”, an ti bawk a.
“Heng thilte kalpui a nih tawh hnuah peace talks tan ni se tichuan harsatnate sutkiana chinfel dan kawng zawn ni se” tiin an sawi bawk a. A hmain Kuki MLA 10 te chuan Centre-ah Kuki areas te tana seperate administration an ngiatna an lo thlen tawh thung a.
Nilaini khan Manipur-a Naga te chen tamnaa awmte chuan State sorkar chu Naga peace talks tihhlawhtlin vat dan zawng tura ngenin, a hmain Naga group te chuan Greater Nagaland an ngiat thu an sawi bawk.
Meitei MLA rual te PM Modi hnenah zualko
