Mellung thar phun zana goal khungtu Ronaldo
2016 European Championship-a Portugal champion-puitu Cristiano Ronaldo khan kum 38 mi ni chungin Ningani zanah ram tan khelmual a lut leh a, mipa footballer zinga international match 197 khel tling awmchhun nihna world record a siam zan hian second half tir lamah inhnaih taka goal hnih khungin, ram tan goal 120 a thun tling a, mipate zinga international goal tilut hnem ber a ni nghal bawk!
Saudi Arabian club Al Nassr thuam inbel mek Ronaldo hian kum 2003 khan a international debut nghakchhuakin, a career-ah world record hian a bawm chho ve reng a, nikum Qatar ram tournament lianah khan mipa zinga World Cup pangaa goal khung kim vek thei awmchhun nihna record tharlam tak a lo siam tawh bawk.
Tunkar tawp lam hi inernational khelh runpui ni leh tawhin, Europe lamah European Championship qualifying an khel a, Ningani zan khan Group J lamah Portugal chuan sili faia an mikhual Liechtenstein sawpin, Ronaldo ropuina kan hmuh belh leh.
He inkhelah hian Ronaldo chuan second-half penalty leh free-kick atangin goal a chhuihlut a; first half-ah erawh goal-ah a talbuai tlat a, clear-cut chance han tih ang chi a neih pawh goal kham chungah thlawhchhuakin, inkhel thunun hneh hle mah se mualneitu team khan minute riatnaa Joao Cancelo khakluh bak goal lawm tur dang an nei lo.
Jose Alvalade Stadium inkhel second half tir lam minute 47-ah Bernardo Silva chuan Portugal goal hnihna thawhin, a bak goal hnih dang chu Ronaldo chanpual a ni ta a; he match-a a goal hnih tihluh leh hmang hian mipate zinga competitive international match bika goal 100 khung tling hmasaber a ni nghal.
Nikum World Cup-ah khan Ro-naldo hian international match khel hnem ber Kuwait forward hlui Bader Al-Mutawa record (196) nihrualpui hman mah se quarter-final stage-ah Morocco hneh loa Portugal an tlak tak avang khan record thar a siam zo ta lo a, Ningani zana Portugal-in Euro 2024 qualifier bul an tanna inkhelah Portugal captain hian mipate zinga ram tana khel hnember nihna hi a chan-pualah a rinlut thei ta chauh a ni.
Ballon d’Or chawimawina vawinga dawng tling tawh Portuguese hian a career-ah domestic top-flight title pasarih la tling tawhin, tualchhung trophy lian (major domestic trophy) dang 11 bakah Champions League panga, Club World Cup pali leh European Championship pakhat a sualchhuak tawh.
Sporting Lisbon, Manchester United, Real Madrid leh Juventus forward hlui Cristiano Ronaldo hi tum hnih lai Best Fifa Men’s player atan thlanchhuah a ni tawh a; nikum November thla khan top-level career goal 800 thun tling hmasaber niin, club leh ram tana a khelhna kawngah mipa lama mimal record engnge-mawzat a kawl mek bawk.
Ronaldo hi an coach bang ta Fernando Santos khan nikum Qatar ram World Cup-ah a chhawr tha duh tlat lo a, substitute bench-ah a kohchhuah vanga a lawmlohna a lantir avang khan tournament pui khelh lai laiin head coach nena an inkar a fuh lo chho a, Portugal game hnuhnung pahnihah luhhmasak chang loin bench a luah a, Morocco tihte mai maiin Europe champion lai chu quarter-final atangin an petchhuak a; Ronaldo khelhna hmun pe tha duh lo Santos chuan dem a hlawh nghe nghe.
Euro 2024 qualifier lamah pawh hian Portuguese starting XI chang tura beisei a ni lo a, mahse, manager thar Roberto Martinez a lo lang a, captain atan Ronaldo bawk rawn nemnghet lehin, team a enkawl vawikhatnaah an superstar chu luh hmasak a chantir a, record bawkin a bawm zui leh nghal chat!
Denmark 3-1 Finland
Ningani zan European Cham-pionship Group H qualifying cam-paign bultanna lamah an hat-trick hero Rasmus Hojlund goal hlang hmangin mualneitu Denmark chuan Parken Stadium-ah nuamsain Finland an hneh.
Kheimit hliam avanga an playmaker Christian Eriksen an chhawr theih loh bakah Danes lam hian defender Andreas Christensen pawh a ke a tihnat avangin he match-ah hian a tir lam minute 18 chhung bak an chhawr hmna lo a, mahse, home fans lamin Christensen chhuah hnu lawkah an goal hmahruai lawm tur an nei zui ta tho a, Hojlund-a goal khatna chu.
Tarlan tak angin, kum 20 mi lek Hojlund hian ram tana match thum a khelh tlin zanah goal hnih dang thun belhin, Finland tan second half-ah Oliver Antman chuan counter-attack atangin goal khat khung ve bawk mah se Finns tlawm tur a dal zo lo.
Mellung thar phun zana goal khungtu Ronaldo
![](https://theaizawlpost.org/wp-content/uploads/2023/03/ro-1.jpg)