Messi chawlh hun tur la hriat loh zel

Messi chawlh hun tur la hriat loh zel
Argentina captain Lionel Messi hian engtia rei chiah nge international football a khelh zui zel dawn tih hi mite ngaihven a tling a, 2026 World Cup-ah kan hmuh leh mai rinna a lian zel!
Kum 36 mi hian 2022 World Cup zawh ruala international a chawlhsan zui ve tawh mai a inring hman tih tunhnaiah a sawichhuak a, a nih loh pawhin kum thara South America khawmualpui ramte football-a inelna sangber Copa America piahlam thleng thleng chu a ngaihtuah thleng pha lo tih sawi chungin tunah erawh Argentina thuam inbel chunga a hun tha leh duhawm ber a hman mek avangin kum 2026 World Cup pawh a sawibo thei ta lo tih a tarlang tel.
United States leilunga khelh tur kum thar Copa America-ah hian a tumhnihna atana khawmualpui title lakpui leh tumin Messi hian Argentina captain banhren hren leh ngei a tum nghet a, tah mai chuan tawp tum loin US, Mexico leh Canada ramte inthlentawm tur 2026 World Cup pawh a khel lo ang tih a sawi thei tawh lo!
Tunhnaia ESPN lamin an kawmnaah Messi chuan, “Keimaha nuam tihna leh tuina a la awm piahlama ram tana pek tur nei vea ka la inngaih chhung chuan (Argentina tan hian) ka la khel chhunzawm zel mai ang. Tuna ka dahlenber ni rih chu Copa America khelh leh phawt hi a ni.
“Chumi hnu lamah chuan World Cup ka khel leh dawn em tih chu hunin a la hril ang chu. 2026 World Cup-ah chuan kum 39 mi ka ni ve tawh dawn a, leilung kalphungah chuan chuti ang kuma World Cup khelh ka tan a rem lo ngei mai a…
Kum 2022 World Cup zawh kha chuan ka chawlh mai tawh a rinawm viau a, mahse, tunhma zawng aiin national team-a tel zui zel hi ka thlahlel ta tlat mai a; he team-ah hian hun danglam bik kan dai a, sinthuah chakin ka rum a, kan hma kum hnih thum lo herchhuak leh tur ngaihtuah lek loa thil tamtak awmna football lipuia la hleuh rih hi ka duh a ni,” a ti.
Ballon d’Or award tum riat dawng thei awmchhun Argentine great hian Copa America hnuhnungber American leilunga an nghahtum kum 2016 centenary edition-ah khan Argentina chu final thlenpui bmah se final penalty shootout-ah Chile an hneh lo a; Messi ho hian 2014 World Cup leh 2015 Copa America final-ah an tlawm tawh bawk a, a zawna tournament lian pathuma an chak loh fai vek hnu nikum Arab ram world cup-ah an captain ropui hoa nuih ni a herchhuak a; kum 2021 khan Messi ho hian khawmualpui title an lo sualchhuak tawh bawk.
South Americans hi World Cup final penalty peta champion lai France an hneh hma khan South America leh Europe champion ve ve inelna 2022 Finalissima-ah Italy an hneh a; Barcelona striker hlui hian international chawlhsan a la ui tih a tawngkam atangin a hriat theih.
Messi chuan, “Kan hma Copa America-ah hian kan chefuh leh mai thei a, ram tana ka khelh chhunzawm zelna tur hian engkimin min thawhsak a ni ber a; kan chetha ta lo a nih chuan inngaihtuah ka ngai tawh mai thei.
“World champion nihna khan ka hnathawhah rilru lama muan veng vengna min thlen a, chu rilru thlakdanglamna chuan engkim a hmatiama hlawh-chhuak zel thei ni tura ngaihna min thlen,” ti hialin a tana World Cup trophy lak hlutzia a tarlang tel.
Nakkum Copa America-ah hian CONCACAF region atangin team pariat an chhuak dawn a, North America khawmualpui atangin sawm bik pahnih tournament nghahna US leh Mexico an tel bawk ang. December ni 7 hian he tournament-a intum tur an pawt dawn a ni.