Messi hlawh thar tura an sawi pound maktaduai 552 !!
Khawvela footballer piangchhuak tawh zinga ropui bera ngaitu ngah ber tih ngam Lionel Messi chu a elpui kumhlun Cristiano Ronaldo hnungzuia Saudi Arabia pan tura sawirik a ni zui zel a, Arab club hausa Al-Hilal chuan kum hnih chhunga pound maktaduai 522 tehreng hlawh turin an sawm niin media lamin an tarlang!
Argentine World Cup winner hi tunah kum 35 mi lai ni ve tawh mah se football level sang berah pawh a vanglai hmang ang maiin a la inlan thei a, world cup lo thleng leh turah pawh hian la inlan leh thei hial tura beisei niin, season kal lai tawp rual hian a khelh mekna Paris Saint-Germain a chhuahsan dawn tih a chiang tawh a; season hnih lek a khawsakna PSG-ah hian an beisei ber Champions League title a lakpui zawh loh avang leh tun dinhmunah club lamin hmachhawp lian tham aia an naupangte ei tling tura hrual lam ngaipawimawh zawka a hriat vanga chhuah duh niin an sawi.
Messi-te ang transfer thawm hi a te thei lo a, Argentine inkara ding club-te pawh an hraw lo thei lo a, thudik karah thuthang leng vel pawh a tam lo thei lo.
Tarlan tawh thin angin, PSG-ah hian kum hnih contract a ziah lai khan amah leh club lam remtihnain kum khat dang contract pawhsei theih tih bilh tel a ni a, mahse, season hnih hnuah French champion chhuahsan a thlang ta zawk a; a club thar tura Al-Hilal an sawirik hluai laiin kum 2021 maia a chhuahsan tak Barcelona pawhin an theihna zawng zawnga an superstar hruaikir leh an tum a, chumi chung-chang pawh kan hrut tel nghal ang!
Kan hnung deuh khan a nupui Antonela Roccuzzo leh a fapate pahnih Mateo leh Ciro hruaiin Saudi Arabia an tlawh a, a khelhna club thuneitute phalna la hmasa loa zin a nih avangin PSG chuan Argentine player hi hun rei vak lo chhung atan an ‘suspend’ nghe nghe a nih kha.
Arab rama a zu zin chuan Saudi Arabia club nena an inzawmna a tingaihnawm zual sauh a, sap chanchinbu lian Daily Mail thu lakna chuan Riyadh khawpuia inbun Al-Hilal team tura an sawmna zat sum hi tarlangin, Saudi Arabian club nen hian a thuphungin in-remna an siam fel der tawh niin a ziak!
Nikum December thla Qatar ram world cup final penalty peta France an hneh hnu khan Messi hian football-a chawimawina lian awm thei zawng zawng a rut kim ta a, club leh international kawrtkaia sualchhuah loh nei tawh lo Argentine hian chawlh hman tinuam zualtu atana sum tamna a pan ve mai rinna pawh a piang ve mek bawk!
Tarlan tawh angin, AFP news agency chuan Messi senglut tura Al-Hilal inhuamna zat (£522million) chu Messi pawh hian a pawm tawh a, kum hnih chhunga heti zat a hlawh bakah kum khat dang contract la pawhsei theih turin inremna hmasa an peih tawh niin a tarlang a, chuti a nih chuan kum 38 a tlin thlengin Riyadh khaw team thlengin a khel thei dawn tihna a ni ang.
PSG-ah hian season khat chhungin pound maktaduai 103.4 tehreng a hlawh kai tho a, mahse, Saudi Arabia a pan a nih ngat chuan a hlawh hi a let thawk aiin a tam dawn!
He boruakah hian Messi pa Jorge a rawn tawngchhuak vat a, AFP report chu rintlak a nih loh thu leh tun dinhmunah a fapa hmalam hun atan inremna engmah siam a la nih loh thu a sawi.
Al-Hilal bihchiang deuh ang
Chutia Lionel Messi club thar ni mai thei dinhmuna ding mek ni ta chuan ngaih-ven a hlawh thar hluai lo thei lo a, tute nge an nih chiah hi thlir zui lawk teh ang.
Al-Hilal hi Saudi Arabia mai bakah Asia khawmualpuia club hlawhtling berte zinga pakhat an ni a, Messi nena sawizawm an nih hnu hian mite’n an ngaihven zual sauh.
Portuguese star Ronaldo khelh mekna Saudi club tho Al-Nassr nen khawpui pakhat intawm an ni a, an sulhnu hlui atang pawhin an lian zawkin, an hlawhtling zawk bawk.
Kum 65 laia upa ni ve tawh Al-Hilal hi Saudi Professional League title la hnem ber niin, Saudi top flight-ah tum 18 an champion tling tawh a; AFC Champions League lallukhum vawili an khum tling tawh bawk.
Asia khawmualpuia club inelna lian bera an champion hnuhnunber kum 2021 final-ah South Korean club Pohang Steelers chu sihnih faiin an hneh a; a hmain kum 1991, 2000 leh 2019-ah an champion tawh bawk.
AFC Champions League final hnu-hnungber pawh kha khelin, khelh hnih belhkhawmah 1-2-in Japanese club Urawa Red Diamonds an hneh lo a; kha kha Champions League final vawinga an luhna leh an tlawm awmchhun a ni nghal.
Barcelona thawm ve thung
Nou Camp-a a khawsak laia a pu ni thin Pep Guardiola khan Messi chu Barca lama a kirleh tur thu a sawi a; club tarlan pahnihte bakah hian North American Major League Soccer club Inter Miami nen pawh sawizawm a ni tel a, hei erawh thuk taka luhchilh tlak niin a lang lo!
Laporta a pawr thar!
Barcelona club president Joan Laporta chuan tunhnaiah Messi hruai-kirleh tura theihtawp an chhuah tur thu sawi chungin Barca chu Argentina forward in dik tak a nih thu a sawi.
Kum 2004 atanga 2021 chhung khan Messi hian Barcelona thuam inbel chungin La Liga title 10 a petchhuak tling a, kumin June thlaa a Paris St-Germain contract a tawp hunah Catalan team hi a kirlehna tur ni theia ngaih pakhat a nih mek laiin Spanish broadcaster TV3-in an kawm-naah Laporta a tawng pawr ngam viau a, Messi signature chang turin Barcelona chuan tu pawh an elpui pha tih a sawi!
“History hian min thlawp tlat a, kan rilru puthmang a khawng tha a, khawvel pumah fans maktaduai 400 chuang kan nei bawk,” a ti dur dur!
Sawizawmin, “Paris St-Germain player a la ni mek a, season tawp thleng kan nghah phawt a ngai, a hun a thlen hunah zawi damdapin hemi chungchang hi thui zawk kan sawiho thei ang.
“Saudi Arabia zah chungin Barca chu Barca a ni a, Messi tan home a ni,” a ti.
Messi hlawh thar tura an sawi pound maktaduai 552 !!
