Karliamta maia Paris St Germain tana a match hnuhnung ber khel Lionel Messi kalna tur inrinsiaknain a vawrtawp a thlen chhoh mek laiin Thawhtanni khan a hringtu pa a tawngchhuak a, Barcelona lam a awn!
Loh theih loh sum lam harsatna avangin kum 2021 khan Barca chuan an rohlu kawl Argentina forward an chhuahtir a, French top flight chang kumtin chunga an awh ber Uefa Champions League trophy hawn thei lo PSG lamin beiseina sang tak nen senglut mah se football superstar Messi ho pawhin Europe-ah an champion thei ta chuang lo a; Messi pawh chuan an inremnaa kum khat dang contract pawhsei theih chu tinung duh loin chhuah a thlang ta zawk a ni.
Kum 35 mi a ni ve tawh a, Europe level sang ber khel turin a club hluiah a kirleh dawn nge uaithla lam tawhte sum siamna America leilung lam a hawi dawn nge a elpui kumhlun Cristiano Ronaldo hnungzuiin sum tamna dang Arab ram a pan dawn tih zawhna a len chhoh zel laiin a pa thu leh hla hriat tur a awm a, Catalan mipui tan chanchin lawmawm lam niin a lang!
Messi pa Jorge chuan “Leo hian Barca lama kirleh a duh a, kei pawhin ka duhpui thlap. Nou Camp-a kirleh chungchangah hian kan inringtawk em em a ni,” a ti.
Kum 13 mi lek a nih laia Barcelona youth set-up zawm tawh Messi hian inelna hrang hrangah Catalan team tan game 77i atanga goal 672 thunin he club tana goal khung hnem ber a ni a; Financial Fair Play rules avangin Nou Camp club-in an hum zo ta lo kha a ni a, free agent ni chungin PSG-ah kum hnih daih contract a ziak a, Champions League trophy lakpui zo loin a chhuak dawn ta a ni.
Saudi Arabian club Al Ittihad nena sawizawm a nih laiin United States-a an Major League Soccer club Inter Miami pawh Messi kal theihna tur nia ngaih a ni.
Messi hmalam hun tinzawnin a pa a tawngchhuak
