Messi India tour-in chhim lam hrut tel dawn
India rama Lionel Messi lo zin tur ‘GOAT Tour to India 2025’ an tih mai chu a huang an zauh leh ta hret a, India ram kil li an huam dawn ta a, chhim lam Hyderabad an rinluh tel leh tak hnuah Argentine great zinna tur khawpuite chu khawchhak lamah Kolkata, chhim lamah Hyderabad, khawthlang lamah Mumbai leh hmar lamah New Delhi-te a ni ta.
GOAT Tour-a India chhim lam khawpui lian leh changkang Hyderabad an rinluh thar leh tak chhan hi Messi telna tur Kerala state-a Argentina national team friendly match khelh tur an cancel leh tak vang niin a lang.
A chhan pawh Kerala Sports Minister V. Abdurahiman ngeiin November ni 17-a Argentina-in Kochi khawpuia friendly match an khelh tur thu a lo puan tawh chu tunhnaiah an thulh leh ta rih a, international window dang rawn herchhuah leh hun atan dah bawk mah se thil a chiang ta lo ruai a, hei vang hian Messi ‘GOAT Tour’ an ennawn tumin south Indian lam an hawi zui ta a ni.
Karliamta Inrinni khan ‘GOAT Tour to India 2025’ huaihawttu (organiser) Satadru Dutta chuan he thu hi puangin, “Tunah chuan chhim lam pawh kan tuam dawn ta a, hei hi south India lama football fans maktaduai tel tana tih a ni.
“Ti hi chuan India ram chu kan cover kim dawn ta a; khawthlang lam hi Mumbai kaltlangin kan tuam dawn a, chhak lamah Kolkata, hmar lamah Delhi a lo ni leh ang a; chhim lamah Chennai, Kerala leh Hyderabad-te hi Messi fan tamna a ni,” tiin Messi magic show khumna atana Hyderabad an thlan boruak sawi chhunzawmin:
“South lamin hnaivai zawka Messi chevel an hmuh theihna turin chhim lam mite chuan Hyderabad an pankhawm thei dawn a; chawlhkar khat chhungin Hyderabad event atana ticket book hun hi hawn hman a ni ang a; a hmun tur pawh en tawh niin, Gachibowli leh Rajiv Gandhi International Stadium buk a ni a ang,” Dutta chuan a ti.
Meesi lo zin tur programme (itinerary) ennawn chungchang tarlang zui zelin Dutta chuan Ahmedabad aia Hyderabad thlan a nih dan a sawifiah a; Messi chu December ni 12 zanlaiah emaw December ni 13 zing lamah emaw India leilung rap tura duan a nih thu leh Miami khawpui atangin Dubai-ah ni hnih thum a chawlhahdam det ang a, Arab tumhmun atang chuan a private jet-a Kolkata a thlawhluh tur thu a sawi.
Kum 2011 friendly khela Venezuela a hmachhawn hnu lama India leilung rap leh ta ngai lo Argentine superstar ruala lo zin turte hi hun rei tak a team-mate lo ni tawhte leh a thian tha zualte an ni dawn a, chu’ng zinga mi Luis Suarez leh Rodrigo De Paul-te chuan an thianpa an rawn zui tur thu hi an nemnghet tawh a ni.
Dutta mimal hmalakna liau liaua kalpui mek he GOAT Tour-ah hian celebrity football match hrang hrang bakah concert a awm dawn a, hmaichhana fans lam nena inhmuhna hun (meet-and-greet sessions) bakah naupangho kianga hun hman (masterclasses for children) leh chawimawina hun (felicitation ceremony) tihte chu khawpui palia an hun hman dan tur a ni ang.
Tarlan tawh thin angin, Messi hian December ni 13 khian Kolkata khuaah tour a tan dawn a; he mi tlai vek hian Hyderabad thlawklutin, December ni 14-ah Mumbai a thleng ang a; December ni 15-ah New Delhi lutin, Prime Minister Narendra Modi chenna inah a tour zialfel a ni ang.
Tun dinhmuna ticket hralh tawh dan atangin Messi lo tualchai tur boruak hi a te dawn lo tih a lang reng tawh a; Mumbai khaw khelmual lian Wankhede Stadium-a thutna 28,000 awm chu an hralh zo hneh hle a; he stadium-a thutna man tlawm ber pawh hi Rs. 6,980, a ni hem mai!
Ticket hi ticketing portal district.in kaltlanga zawrh chhuah a ni.
Kolkata-ah pawh ticket 68,000 an siam chu a zo hnai tawh a; he khawpuia ticket hi Rs. 4,366 atanga intan a ni.
New Delhi khawpuia Arun Jaitley Stadium pawhin fans 28,000 a mikhual thei dawn a, chuti zat ticket an siam zinga man tlawm ber chu Rs. 7,670 niin, an hralh zo tep tawh tih Dutta chuan a sawi!
India rama Messi lo zin tur hi Mizo football fans zingah pawh chhim kan awm ngeiin a rinawm a, chu’ng mite tante pawh a ni tel ang a, hriat ve hrim hrimah Mizo tawnga dah buai loin kan han chhawpchhuak ve hrim hrim e.
Revised Itinerary
Dec 12-13 (Kolkata): Arrival in the midnight or early hours; Meet and greet at Hotel (9.30 10.40am); GOAT Cup at Salt Lake Stadium (11.30am 1.10pm); Statue unveiling at Sreebhumi, Lake Lake Town; leaves for Hyderabad (2.15pm).
Dec 13 (Hyderabad): Meet and greet (5pm); GOAT Cup (7 8.45pm) at either Rajiv Gandhi or Gachibowli Stadiums.
Dec 14 (Mumbai): Meet and greet at Hotel (12 noon); Padel GOAT Cup inauguration; GOAT Cup at Wankhede Stadium (5.30pm).
Dec 15 (New Delhi): Meeting with Prime Minister Narendra Modi; GOAT Cup at Arun Jaitley Stadium (2.15pm).