French Ligue 1 title race-a an elpui lian ber Olympique de Marseille muala 3-0 hnehna an chan zanah Lionel Messi leh Kylian Mbappe chuan goal khung ve vein, Argentine hian goal khat a thawh a, French striker zawk hian goal hnih thunin, Paris St Germain star pahnih hian Pathianni zanah mellung thar an phun ve ve.
Mbappe thawhrah hmanga first half minute 29-a mikhual goal hnihna thawhtu Messi hian a career-ah club goal 700 a thun tling chiah a; he goal khat vang hian Argentina captain hi Cristiano Ronaldo hnung zuia Europe top-five leagues club goal heti zat thun tling thei pahnihna a ni.
Messi siamsak atang ve vea minute 25-na leh second half minute 55-naa goal khungtu France striker Mbappe hian Paris club tan goal 200 khawl tling chiahin, PSG tana goal khung hnember ni reng thin Edinson Cavani record a nihrualpui ve chiah bawk.
Kum 24 mi Mbappe hian kum 2017-a Monaco atanga a insawn hnuah PSG tan double century goal thunin, a team-mate hlui Cavani aiin game a khel tlem zawk nghe nghe.
World Cup winner ve bawk Messi hian Barcelona chhuah-sana December 2022-a Ligue 1 giants a zawm hnuah PSG tan goal 28 a tilut tling ta a; kum 13 mi a nih laia a zawm tawh a club hlui Barca tan khan game 778-ah club goal 672 tilut tlingin, Ballon d’Or vawisarih a dawng tawh a; Catalan club thuam inbel chunga trophy 35 chawiin, PSG a zawm hnuah title pahnih a lakpui leh tawh bawk.
Kum 35 mi Messi hmaa European club goal 700 thun pel Ronaldo khan tun season tir lam khan Manchester United behchhan chungin mellung thar a lo phun tawh a, tunah Saudi Arabia club Al-Nassr tan a khel mek.
Goal 98 nena Argentina tana goal khung hnem ber ni mek Messi hian an ram tana goal 100 thun tling player pathumna ni turin goal hnih chiah a mamawh tawh a, club leh international level-a record awm thei zawng zawng hui kim a hnaih zel!
Orange Velodrome-a an point thum hlawhchhuah leh nen Paris St Germain chuan league table-a an hmahruaina sawh-nghet leh sauhin, an hnuai chiaha pahnihna luahtu Mar-seille lakah point riatin an fal ta.
Messi leh Mbappe mellung thar phun zan
