Messi leh Ronaldo chungchanga inhnialna kal zelah Carragher inzep
Football-a trophy lian leh ropui chin la zo kim chunga mimal chawimawina hrawl a lak phak awm thei zawng zawng a huikim hnuah Lionel Messi chu footballer piang chhuak tawh zawng zawng zinga thiambera leh ropuibera ngaihna a len hle tawh laiin a elpui kumhlun Cristiano Ronaldo tantute chuan Portuguese superstar aia Argentine ropui bikna an hmu lo a, tunge tha ber tih inhnialna tawp hlei thei loah hian tunhnai khan Liverpool star hlui Jamie Carragher a tawngchhuak a, Messi chu Ronaldo aia u a nih thu a sawi!
Thiam leh ropuiber (greatest of all time) sawina, a lam tawia G.O.A.T an tih mai chu Argentina superstar Lionel Messi ngei mai hi a nih thu England defender hlui hian sawiin, Portuguese goal-scoring machine Cristiano Ronaldo pawh goal khungtu ropui ve bawk ni mah se Messi level a pha lo tiin a ngaihdan a phawrh.
Tarlan tawh thin angin, tunlai football (modern-day football)-a mimal inthlurbing na ber chu Ronaldo leh Messi hi niin, Spain rama an khawsak ve ve lai khan Messi chuan FC Barcelona thuam inbelin, Ronaldo chuan Real Madrid-ah attacking charge a la ve thung a, Spanish football tingaihnawm a, tihmuhnawmtu an ni a, khawvela fooballer tha bera ngaitu ngah ve ve an ni.
Tunhnai khan CBCS Sports kaltlangin Carragher chuan a hmuh dan dik tak a sawichhuak a, “Inhnial chi pawh va ni suh. Ronaldo hian engtik lai mahin Messi chimchin hi a pha ngai lo. Ronaldo hi leilunga goal khungtu ropui chu a ni ngei mai a, mahse, Messi level hi a hnaih pawh a hnaih pha lo. Ronaldo hian goal tamtak a khung a, Messi pawh chuti tho chu a ni a, mahse, Argentine hi chu awihawm loh khawpa thiam leh mak player a ni,” a ti.
Messi hian World Cup 2022-ah khan a magic thulkhung show lehin, La Albiceleste chu Saudi Arabia thlalerah World Cup trophy a lakpui a; footballer mimal chawimawina ngaihsan hlawh berte zinga mi Ballon d’Or award tum riat dawng thei awmchhun niin, Olympic Games football leh South America khawmualpui huap football inelna lianberah a ram champion-pui tawhin, khawvela club football inelna sangber Champions League title ni se Barca thuam inbel chungin a fawp awl lo bawk!
Europe atangin America leilungah a insawn ta teh daih a; November thlatir mai khan Inter Miam tana khami thlaa khel tha ber nihna (MVP) chawimawina a la dawng zawk zak a; a captain-na hnuaiah Miami hian an club chanchina trophy hmasaber an sualchhuak tawh bawk.
Arab lama insawn ve ta daih bawk Ronaldo pawh Saudi Pro League-a player hraw leh langsarber ni mekin, a khelhna Al Nassr club tan tunkar tir Thawhtanni mai khan Al Akhdoud lakah goal hnih a thun leh a, Riyadh khawpuia Al-Awwal Park inkhela a goal hnih nen Ballon d’Or award tum nga dawng ve tawh Portuguese hian Saudi Pro League kal mekah match 13 atangin goal 15 a tilut tling tawh.
A elpui Messi hi a hraw em a tih lohah chuan Portuguese superstar hi engtik lai maha dahhniam theih a ni lo a, kumin chhung ringawt pawh hian goal 61 khung tling tawhin, a career league goal 527 hmangin football history-a first-division goal thun hnember a ni mek.
Messi leh Ronaldo chungchanga inhnialna kal zelah Carragher inzep
![](https://theaizawlpost.org/wp-content/uploads/Untitled-370.jpg)