Daily Newspaper

Messi nena intawnleh zanah Ronaldo ropui zawk

11

Hripui a kai avangin Cristiano Ronaldo chuan Real Madrid a chhuahsan hnua Lionel Messi nena intawn theihna hun remchang hmasaber chu kan hnung lawk khan a bawhpelh a, Thawhlehni zan khan chu hun rem-chang chu a inherchhuak ta nge nge a, Nou Camp Champions League Group G match-a Ju-ventus leh Barcelona insut zanah Portuguese hian penalty atanga goal hnih thunin, a team chu Messi & Co. lakah 3-0 hnehna buhchangrum a chanpui.

Spain leilunga European heavyweight pahnih inhmachhawn hi Group G hmahruaitu tur bukna a nih avangin last 16 lutchiang tawh ve ve inkhel mah ni se a boruak a dul thei lo a, chumi piah lamah footballer la inkhel mek leh piangchhuak tawh hrim hrim zinga thiamber titu ngah ve ve Ronaldo leh Messi-te La Liga pawn lama an intawnna langsar a nih bawk avangin inkhel ngaihven hlawh a ni.

Thawhlehni inkhelah hian Italian mikhualho an inthlahrung lo kher mai a, tan atanga minute 13-na lekah goal hmahruai thunin, he goal hi penalty atanga Ronaldo chhuihluh a ni a, Uruguay defender Ronald Araujo laka a hlawhchhuah penalty chu Barca goal-veng Marc-Andre ter Stegen-a tluklohna lamah a chhuihlut a; second half tir lamah Juve forward Ronaldo bawk hian penalty atangin a goal hnihna leh sithum faia Italian champion chakna goal ni zui ta a khung leh a, a team chu Group G hmahruaitu nihpuiin, a career-ah Champions League goal 134 a khung tling chiah bawk.

Juve goal hnihna hi first half minute 20-na leka Weston McKennie-a bicycle kick mawi takin a hrinchhuah a ni a; Ronaldo penalty vawihnihna kha Clement Lenglet-a handball hrinchhuah a ni thung.

Inkhelh banah Barca boss Ronald Koeman chuan an hriam tawk lo ve hrim hrim tih sawiin, an tha tawk lo a, inkhel thunun pawh an tum tawk lo a, hlau tlat angin a naute an inlan niin a sawi.

Tun kha kum 2016 hnu lam Champions League group game-a Barcelona tlawm leh vawikhatna niin, Juventus nen khelh rukah point 15 ve ve nei bawk mah se head-to-head record-a an hniam zawk avangin an group hmahruaitu ni chungin Thawhtanni last 16 draw an nghak thei ta lo a ni, unseeded ni chungin draw an nghah a ngai dawn.

Barcelona forward Lionel Messi leh Ronaldo-te kha May 2018 hnu lama khelmual chhunga an inhmachhawn leh vawikhatna niin, international, European leh domestic stage-ah belhkhawma player ropui bik pahnih vawi 36 intawnna chiah a ni bawk.

Juventus superstar-in goal hnih a tihluh laiin Barca captain chuan kum 42 mi lai ni tawh Juve keeper Gianluigi Buffon a paltlang zo tlat lo a, save tha tak tak nen Buffon khan Nou Camp-ah mikhual team a chakpui tiin a sawi theih awm e.

Messi leh Ronaldo hian belhkhawmin Champions League trophy vawikua an la tling tawh a, he competition bika an pahnih goal thun belhkawm hi 252 zet a tling tawh bawk.

Thawhlehni zan kha Ronaldo night niin, goal hnih a chhuihlut a, khel-mual chhunga Messi awm ve chunga Barcelona laka Champions League goal a khung vawikhatna a ni.

Kum 12 kalta kha Champions League match khela player pahnih in-hmachhawn vawikhatna ni daih tawhin, Thawh-lehni zanah chuan he competition history-a goal khung hnember ni mek Ronaldo a ropui zawk a, Barcelona-in target an fuh zawng zawng vawi-sariha ball thawnluttu ni vek Messi chuan a hun tha hmuh heti zozai atang hian goal-a chantir pakhat pawh a nei zo lo a, Italian team goal-a ding kha Buffon a nih miau avangin Messi pawh a Messi thei lo a ni ber!

Antoine Griezmann pawh a chefuh zo bik lo a, a chance neihah goal kham tihperin, inkhelh banah French forward hian an chakloh chhan kha an manager tihsual a nih loh thu sawiin, “Player-te mawhphurhna a nih loh chuan tunge mawhpuh tur awm ang? Khelmuala chhuaka inkhelte kan ni a, kha game-ah khan kan engkim kan hloh fai vek a, duhna leh phurna, nungchang tlan tura thathona, engkim kha a chhe fai vek a ni ber,” tiin an inkhel a thlirlet.

2020-21 season tir lam khan Messi hian Cham-pions League record thar siamin, he competition-a a zawn zata season 16 chhung goal khung thei hmasaber nihna a lo chang tawh a, Turin khaw club an mikhual zanah erawh Ronaldo awm vang nge goal a sualchhuak zo tlat lo.

Kum 35 mi Ronaldo khan penalty atanga goal hnih a chhuihlut tih loh chu chance a ngah lo a, Messi nena khaikhin tlak a nei meuh lo.

Chak tam lamah pawh Ronaldo hian Messi hi a la pha lo a, vawi 27 an inhmachhawn tawhah Argentine hi vawi 16 chakin, Portuguese hi vawi 11 a chak zawk ve thung.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy