Daily Newspaper

Messi ngheh zui leh ringtu Rivaldo

33

Blaugrana legend Rivaldo khan tun nipui thawt laia a chhuah theih tak loh rau rauah chuan Barcelona superstar Lionel Messi hian a ngaihdan thlak hlawkin kumhnih daih tur contract thar a ziah leh law law a rin thu a sawichhuak phawng.

Club thuneitu lawkte laka a lungawiloh thu auchhuahpui ve ta lawng lawng fo Argentine hian a chhe thei ang bera 2019-20 season an hman zawh hnu kan hnung lawk khan Camp Nou atanga inputchuah dilna a thehlut rup a, an inremna ziah hnuhnunber behchhanin a free-a chhuah theih an inbeisei a, mahse, club lamin a thlawna chhuahtir awzawng an lo remti lo a, tun thlenga a club neihchhun la ni reng nen court-a inkhingbuai duh lo chhuanlamin Messi pawh a inhnakdawk a, Barca tana training zawmin season thar bul a tan chho leh ta a, heti a nih tak rau rauah chuan hmundang hmundang pan buai loa kumhnih daih inremna a a ziah leh law law mai a rin thu Brazilian star hlui hian a sawichhuak ta a ni.

Rivaldo chuan Betfair hnenah a thlir dan sawiin, “Barca atanga a thian hnai pahnih Luis Suarez leh Arturo Vidal an chhuah hnuah press lam tan pawh season tawp ruala Messi chhuah ve nghal mai rinna hi a lian khawpin a rinawm a, mahse, he ngaihdan ep chiaha thil a thlen theihna chhan hrang hrang hi awm theiin ka hria.

“Inthlakna pindan lamah thian thar a chhar ang a, nakum president thar thlan tur hi theihnghilh lo ta bawk ila, hei hian kan tunlai huntawn hi a chhilhbo thei dawn bawk a; Messi leh tuna president tanglai inkara thil thleng hi kan zu hre ve vek lo a, tunah rih chuan nghak ila, a rilru thlaka kumhnih daih tur contract thar a ziah ngei hi beisei phawt ang u,” a ti.

Brazil international hlui Rivaldo hian tuna Barcelona player naupang zingah Ansu Fati chu nakina hming hraw la ni thei tur, Messi thlak thei hnaivai nia a ngaih thu a tarlang tel.

Liga giants hian tunhnaiah rawlthar kum 17 mi Fati hi inremna thar an ziahpui a, first-team squad a luah hnuah he club legend-te hnung zui thei tur zingah Spanish player hi Brazilian chuan a rinlut.

Karliamta khan Rivaldo chuan, “Ansu Fati hian tunkarah a Barcelona contract pawtseiin, release clause ringawt pawh euro maktaduai 400 tehreng a tling a, he young Spanish player hi club hmalam huna an milian tur a ni,” tiin a hmuh dan a sawichhuak.

Suarez thlavang hauhtu Messi
Barcelona striker Lionel Messi chuan a team-mate, a thianpa leh a thenawmpa ni bawk Luis Suarez an petchhuah chungchangah club thuneitu lawkte demna a auchhuahpui a, Catalan club tana goal thun hnem pathumna ni pha Uruguayan chu hnawhchhuah phu a nih loh thu a sawi.

Tarlawn fo tawh angin, Ningania Atletico Madrid zawm fel ta Suarez hi Barcelona player neih tawh zinga Catalan team tana goal thun hnem pathumna niin, season liamta maiah pawh an captain tih loha goal khung hnember a la ni pha a, chuti a nih laia coach tharin a ruahmannaa a tel loh thu a rawn hrilh nghal tawng leh chhuahna kawngkapui a kawhhmuh mawl tawp kha a thianpa Messi chek hian a ngeih bau lo a, team tana a thiltih leh player mimal anga a thawhhlawk dan enin Uruguayan striker an petchhuah danah Argentine a lawm lo.

Barca superstar chuan Instagram lamah a thenawmpa a vuipui thu hi tarchhuakin: “Heti maia an petchhuak che hi an tih loh tawp tur a ni a, he dinhmuna din hi i phu lo, mahse, tun dinhmunah rih chuan engmah hian min tiphu zawk thei tawh lo chu a nih ber hi,” ti hialin a angchhuak.

A thianpa a ngaih tur thu tarlang tel chungin, “Kum tamtak hun kan lo hmangdun tawh a, chawchhun leh zanrih thlengin kan kildun tam a, kan hun hman dun tawhah khan thil tam tak kan theihnghilh tawh loh tur a awm a, thuam thar inbel chunga hmuh che hi a mak dawn hle mai a, khelmual chhunga kan inep tur hi a mak lehzual dawn.

“I pha an ngeia thlahna hun buatsaihsak hi kan tihtur niin a lang a, team leh mimal ang pawha thil ropui thawkchhuaktu i nih miau avangin he club chanchina player pawimawhberte zinga pakhat i ni pha tlat,” tiin a fak.

Spanish club pahnih hi Uruguayan star chungchangah inremin, Atletico Madrid khan Suarez manah euro maktaduai ruk an chhunglut dawn a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy