Daily Newspaper

Messi out, Mane In?

30

Barcelona chuan an hnen atanga chhuah dil Lionel Messi chu khawvela player manto ber ni turin chhuahtir an phal a. A hmunruak luahtu atan Liverpool forward Sadio Mane lak luh an duh niin Sportmail chuan a tarlang.

Chhuak hmasa lama kan tarlan tawh angin Barcelona fa chuam, an player ropui Lionel Messi chuan chhuah a dil hlawl a, a chhuah theih dan chungchangah an inhnial mek. Messi hian ngaihventu a nei nghal zut a, amah pawhin a pan chak ber nia lang chu Pep Guardiola-a enkawl Manchester City a ni. City hian sum hlawm lian bakah an player thate pek tel an phal niin tarlan a ni.

Manchester City hian Messi lak nan £89.5m an thehchhuak phal a, hei bakah hian an player pawimawh Bernardo Silva, Gabriel Jesus leh Eric Garcia te pek tel an phal cheu bawk. Sum hlawm lian £89.5m bakah player pathum ngawt an pe tel phal hian Messi lak an duh hle tih a tilang a. Benardo Silva leh Gabriel Jesus te phei hi chu an player pawimawh an tling phak hial. An zinga hming langsar lo ber Eric Carcia hi Barcelona hian lak an lo duh sa tawh a ni tlat bawk a, an tan pawh indawrna tha tak a ni thei dawn niin a lang.

City manager Pep Guardiola hi Messi hrechiangtu leh Messi vultir leh zualtu a ni. Messi ngei pawh hian Guardiola hi a ngaina hle a, khawvel hriatah Barca chhuahsan a duh thu a puan zar hma khan Guardiola hi chu Barca chhuahsan a duh tih a lo hrilh daih tawh tih hriat leh hnuhnawh a ni a. Nou Camp chhuahsan a tum thu a sawi hnu lawk khan Messi pa leh a agent ni bawk chuan City dawr turin England a lo pan ve nghal var bawk.

Catalan club lian Barcelo hian an player ropui, vawi 731 khelhsak a, goal 634 zet thunsak tawhtu leh an assist vawi 285 zet nei tawh Messi hmunruak luahtu tur an zawn a ngai ve ta a. Messi hmunruak luahtu atan hian Sadio Mane lak luh an duh.

Liverpool tana khel tha tak Mane hi Barcelona hian an lo hmutai hle tawh thin a, Messi a chhuak dawn nia a lan hnu phei hi chuan an hmutai leh zual. Reds hian Senagal international Mane manah £107m an chhiar a, hetiang zat hi Catalan club hian an sen huam a ngai dawn thung. Mane hi Jurgen Klopp-a player pawimawh leh tangkai ber pawl a ni a, Champions, UEFA Super Cup, Ffia Club World cup leh English Premier League-ah an champion theih nana player thawhhlawk a ni. Season liam ta khan EPL-ah vawi 47 a inlan a, goal 22 zet a thun a, goal thun hnem ber pawl a ni phak hial a ni.

La Liga champion Real Madrid pawhin Mane hi an lo hmutai ve bawk a, lak tumin an lo hel thuak thuak tawh. Reds hian Mane hi an ui ve hle thung a, Virgil van Dijk hlawh zat £220,000 hlawhtir tumin an dawr mek a, kum 28 mi hian thutlukna ala siam duh mai lo thung. Ballon d’Or hial dawng phak turin Liverpool chhuahsan a mamawh niin sawi a ni thin a, Barcelona a zawm a nih chuan mimal chawimawina sang dawn theih beiseina a nei sang leh zual ngei ang.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy