BR Studio MFA Futsal League 2024 chu June ni 22, Inrinni zan khan R. Dengthuama Indoor Stadium, Mualpuiah Senator FC leh Thlangtiang FC chuan final an khel a, 4-2-a chak Thlangtiang FC chuan champion no mawi an chawi.
Senator FC 2-4
Thlangtiang FC
Lalremruata goal hnih tihluh bakah Jonathan Lalrawngbawla leh Zomuansanga goal khat ve ve thawh hmangin Thlangtiang FC hian goal li lawih an khung a; Senator FC goal hnih hi Arom Vanlalrinchhana tihluh ve ve a ni thung.
Team pahnihte inkhel a hmuhnawm a, goal an in thun chhawk zak zak. First half-ah goal khat a lut a, second half-ah goal nga a lut thung.
Goal hmasa ber hi inkhelh tan atanga minute 19-ah Senator FC tan Arom-a chuan a khung a, hun chan ve an hmang zo.
Second half-ah Thlangtiang FC chuan an hun tha neih hmangtangkaiin best player atana thlan Lalremruata’n an siphurh a sut hnuah an hmahruaina goal a khung leh bawk.
Senator FC chuan hnehna chan ngei tumin an nawr a, an rinrawl Arom-a bawk chuan an siphurh sutna goal khungin 2-2 a ni phawt.
Hun tawpna’n minute 10 chiah a la awm tihin Thlangtiang FC tan Jonathan-a leh Zomuana chuan goal khat ve ve khungin hnehna an chang zui ta a ni.
Champion Thlangtiang FC hian trophy bakah tangkafai cheng 80,000 dawngin, pahnihna Senator FC kutah Rs. 40,000 a lut thung.
Best player-a thlan Lalremruata (Thlangtiang FC) chuan Rs. 5,000 leh trophy dawngin, heti zat chiah tournament chhunga goal 28 thuna top scorer ni ta Rony C. Lalenkima (Ramhlun South) hlan a ni bawk.
Fair play award dawngtu KFC Republic kutah Rs. 10,000 hlan niin, final lut zo lo semi-finalist team pahnih Tlangnuam FC leh Tuikhuahtlang FC chuan Rs. 20,000 ve ve an dawng.
MFA Futsal League champion Thlangtiang FC
