Daily Newspaper

MFA special general body meeting

41

Mizoram Football Association (MFA) chuan nimin, Zirtawpni khan Aijal Club-ah Special General Body Meeting an ko a, sports minister Robert Romawia Royte chuan a hmanpui.

MFA hian kum tin season tawp hmain Annual General Body Meeting a ko thin a, kuminah erawh Covid-19 avangin a hun takah meeting hi an ko thei ta lo a, hei vang hian hmanhmawh takin sorkar inkhaihhruaina zawm chungin Special General Body Meeting hi a ko ta a ni.

Meeting hi MFA senior vice president PC Vanlalhruaia’n kaihruaiin, district 11 atang palai an fuankhawm.

President Lal Thanzara chuan thu sawiin, hun khirh tak hnuaia meeting chhimtute chungah lawm thu a sawi a, football hmasawnna’n hmathlir thui tak neiin MFA-in programme hrang hrang duang mah se Covid-19 avanga tihhlawhtlin theih a ni ta lo pawi a tih thu sawi chungin sports minister chu football hmasawnna atana mahni insengso hreh lo a nih thu leh minister ho ngeia hmasawna an neih zel MFA chuan a beisei tih a sawilang tel.

Honorary secretary Lalnghinglova Hmar chuan report pein, 2019-20 season chhungin District FA hrang hrang ruahmanna siamsa Covid-19 avangin tihhlawhtin theih a ni ta lo tih a sawi ve bawk a; chutih rualin district championship pahnih, MFA Cup, MFA Women’s League leh MFA Futsal League erawh kalpui theih a nih bakah FIFA Under 17 Women’s World Cup hun sawn a nih thu a sawi bawk.

Nghingloa chuan, “FIFA atanga kan hmuh artificial turf phah hna pawh Sairang Dinthara MFA Ground-a phah hna kalpui a ni a, chu pawh Covid-19 avang bawkin rampawn atanga hnathawktu an lo luh theih loh avangin grass phah zawh theih a ni rih lo bawk. Hripui kian hunah hian football hi a kal zel a tul miau avangin football kalpui zel dan tur relin kan kalkhawm a, Mizoram leh Mizo football tan theihtawp i chhuah zel ang u,” a ti.

Executive Committee member Joseph Lalrintluanga chuan kum 2019-20 chhunga MFA hmalakna leh hmachhawp hrang hrang video display a buatsaih thlirho a ni bawk.

Khuallian obert Romawia Royte chuan Mizoram sorkarin district thar a siam behchhana district FA thar pathum – Saitual, Khawzawl leh Hnahthial lo ding thar ta lawmawm a tih thu sawi chungin hruaitu atana thlante dusakna a hlan bawk.

Minister chuan Thingtlang lamah pawh football ground-a phullem phah chhoh zel tum a nih thu leh DFA hruaitute pawhin a hmunah va enfiah a, mamawh an neih chuan inthlahruang loa sawi zel turin a chah a, theihtawpa hma lakzel a nih tur thu a sawi bawk.

Romawia chuan hripui vanga tournament khelh theih loh pawi a tih thu leh player-te eizawnna thlenga a sukuk phah a tuarpui thu a sawi a; sports school din zel sawimawi chungin Olympic khel phaa Mizote invawrhchhuah a duh thu leh thenawm state-te aia thleng sang tura tan la turin infiammite leh hruaitute a fuih a, hmachhawp a neih zingah Laldenga North East Piece Cup chu tihhlawhtlin ngei tha a tih thu tarlanh telin, MFA leh District FA-te nen tangruala an hlawhtlinpui ngei a rin thu a sawi.

MFA rorel hi Lal Thanzara’n a hruai a, agenda hrang hrang pakua sawiho niin, MFA Calendar 2020-2021 chu siam rih loh mai ni se, sorkar thuchhuak ngaichangin ngaihtuah that ni se tih a ni.

MFA thurel

1. Covid-19 avanga football inelna chawlh lail^wk chhunzawm leh chuchangah MFA-in sorkar thuchhuak ngai changin ruahmanna siam rawh se tih a ni.

2. Mizoram pumah transfer leh registration mumal zawka kalpui a nih theihna turin 2019 General Body Meeting lama sawi tawh chu AIFF rawtna angin Central Registration System (CRS) kalpui tan ni tawh rawh se tih a ni a, chumi rual chuan player transfer leh registration hi AIFF kalphung zuiin MFA chuan thuchhuah lo siam leh se tiin an rel.

3. Siaha DFA atanga lut rampum huapa football player-te particular record hi MFA hian database-in maintain tawh rawh se tih pawm a ni.

4. District thar pathum kan neih tak avangin inter-district competition hrang hrang thlengtu puihna hi tihtam ni rawh se tih Champhai DFA leh Lawngtlai DFA atanga lut chu kum 2019 General Body Meeting-a rel tawh angin tihpun ngei ni se tih a ni a, a zat erawh bituk rih loh ni se tih a ni.

5. MFA Inter District Age Group Competition-ah hian player checking nei turin district tinah MFA aiawh tirh ni tawh rawh se tih Lawngtlai DFA atanga thulut chu tha tih a ni.

6. District FA tinah Futsal Ground a tam thei ang ber siam a nih theihna’n MFA-in hma la rawh se tih Serchhip DFA atanga thulut chu sawihoa nih hnuah hmalak ni rawh se tih a ni.

7. MFA-in Referee Development Course hi Champhaiah buatsaih rawh se tih Champhai DFA atanga lut chu pawm a ni a, a hun tur erawh sorkar thuchhuah ngaichangin siam ni se tih a nih bakah referee tha nei turin DFA tinte’n hma la bawk se tih a ni.

8. MFA hian Lunglei, Lawngtlai, Siaha, Serchhip, Saitual, Kolasib, Khawzawl leh Champhai DFA-te hming lamtawi hi mumal takin siam rawh se tih Champhai DFA atanga lut chu district-te lungawina angin kal mai se tia rel a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy