Daily Newspaper

MGNREGA-ah ni 82 inhlawh tawh

7

Serchhip District Development Coordination and Monitoring Committee chu Thawhlehni khan an chairman, Lok Sabha MP C. Lalrosanga leh co-chairman, Rajya Sabha MP K Vanlalvena te hona hnuaiah neih a ni a. District chhunga sawrkar laipui scheme hmanga hnathawh hrang hrang an thlir ho.

He thutkhawma report a nih danin, sawrkar kum kal mekah ni 100 inhlawhna – MGNREGA atangin ni 82 inhlawh tawh a ni a, ni 100 inhlawh hman ngei tura beisei a ni. Thingtlang mirethei in sak tanpuina – PMAY (G) hi 2016 atanga tun thlengin Serchhip district-ah mi 100 pek an ni tawh a, an zinga 88 chuan sa zoin an luah tawh a, a dang 12 pawh sak zawh tawh, engemaw tihfel hlek la ngaite an ni tawh a ni.

National Rural Livelihood Missions hnuaiah tunhnaiah Lungchhuanah hmarcha sawngbawlna bun thar a ni a, Lengah aieng herna dah niin Hmuntha, Khawbel leh Hualtu ah alu chin tum mek a ni. PMGSY sumin khaw karkawng 10 thawh mek a ni a, heng zinga a tam zawk hi thawh zawh thawkhat tawh a ni. Thingtlang khuate tana tuilak hnathawhna, Jal Jeevan Mission hnuaiah 2019-2020 financial year-ah khaw 16 tan tuilak hna thawh a ni a, an zinga 10 zawh tawh a ni. Kum 2020-2021 ah khaw dang 7-ah hetiang hmalakna bawk hi thawh zui nghal tur a ni.

Swach Bharat Rural lama hmalaknaah Serchhip chu India ram puma district titha 10 thlanchhuah zingah a tel a, tunah hian chu’ng zinga a titha zual result chu nghah mek a ni. 2019 khan Swachh Survekshan-ah India ram state te (small state) leh UT category-ah pahnihna an dawng a. World Toilet Day Award 2020 lawmman dawng tura thlan an ni bawk. Kum kal mekah naupiang 220 chhinchhiah tawh an ni a, an zinga 2 hi an thi a, naupang kum 5 hnuailam thi 2 an awm bawk. Kum laihawla chhinchhiah danin district chhungah naupang kum 5 hnuailam hi 5978 an awm a, Infant Mortality Rate chu 9 a ni. Immunization achieve rate hi 88.09% niin Champhai district dawta awmin a titha pahnihna an ni.

Thutkhawmah hian Tuikum bialtu MLA, deputy speaker Er Lalrinawma a tel a. Member secretary, district bawrhsap Kumar Abhishek leh a kaihhnawih department hotute an tel a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy