Mi 21 thihna khualbuk kang in neitu man
Delhi Police-te chuan Nilainia Malviya Nagar-a khualbuk kang ta, mi 21 thihna in neitu, Lavkesh Bajaj-a chhiatna thlen ni tlaiah an man tih thuneituten an sawi.
Delhi chhim lama mipui tamna, Hauz Rani-a Flourish Stay B&B-a kangmei a chhuah hnu darkar eng emaw zatah Bajaj-a hi man a ni.
Police-te chuan a hmain Bajaj-a leh a nupui lakah hian look-out circular (LOC) an lo tichhuak tawh a, anmahni zawn chhuah tumin beihpui an thlak nghal bawk.
Kangmei hian khualbuk hi a tichhe vek a, he hmuna kawng chep tak, mihring tamna hmuna hian fire no-objection certificate (NOC) awm lovin khualbik hi kalpui nia sawi a ni a. Mi 21 thi zinga 10 chu Indian an ni a, African pakua leh Turkmenistan mi pahnih an tel niin thuneitute chuan an sawi.
Kangmei hi a darh chak hle a, chhawng ngaa sang hi neih ngei ngei ngai, fire no-objection certificate (NOC) a awm lo nia sawi a ni a. Chhuahna pawh pakhat chauh a awm a, a tukverhte chu nghet tak khar vek niin sensor hmanga kalpui kawngkapui a awm a, chhuitute chuan hei hian a chhunga awmte chhuak tur a timuang niin an ngai.
Mi 58 vel chhanchhuah an ni a, damdawi inah hruai an ni a, mi 21 chu thia puan an ni.
Chhuitute chuan khualbuk hi a phalna pek aia tam pindan siam leh himna tura dan zawm bawhchhiaa kalpui a nih thu an sawi.
Police thuneitute chuan he hmunah hian Delhi sorkarin Bed & Breakfast policy a siam angin pindan paruk chauh phalna a nei tih a sawi a; mahse, pindan 25 vel siam nia sawi a ni a, heng zingah hian a chhawng hnuaiah awm thenkhat pawh a tel nia sawi a ni.
Thuneitute phalna la lem lovin a chhawng pawh tihbelh a ni tih sawi a ni bawk.
Police-te chuan tualthah thubuai an siamsak bakah Bharatiya Nyaya Sanhita-a thupek dang kaihhnawih hnuaiah FIR an ziak lut a. Khualbuk dinna kaihhnawihah hian mi dang tel ve an awm leh awm loh an enfiah zui mek bawk.
Mi 21 thihna khualbuk kang in neitu man
