Mi 300 chuang thihna tui lennaah power leh kawng titha tawh

Mi 300 chuang thihna tui lennaah power leh kawng titha tawh
Pakistan chuan an ram hmar leh hmarchhaka fur ruah sur nasa avanga tui lian leh chhiatna hrang hrang thlenga mi 300 chuang an thih phahna hmuna electricity service chhia 70% chuang siam tha leh tawhin kawng pawh a tam zawk an hawng leh thei tawh tih thuneituten an sawi.
Information Minister Attaullah Tarar chuan Thawhlehni khan kar hmasaa tui lianin a tihchhiat electricity system siam tha turin engineer-ten chhun zan zawmin hna an thawk tih a sawi.
June 26 atang khan fur ruahin sabereka khuangkaih a thlenah mi 700 chuang thi an awm tawh niin National Disaster Management Authority chuan a chhinchhiah a, Tarar-a chuan mi 25,000 chuang hmun hima thiar chhuah an ni tih a sawi.
Information minister chuan kawngpui chhe tam zawk chu tihtlang leh tawh a nih thu leh ei tur leh ni tin mamawh pawh tui lian tuarte hnenah thlen theih a ni tih a sawi.
Sipai thupuangtu, Ahmed Sharif-a chuan sipai doctor-ten dam chhuakte an enkawl a, an engineer-ten thil chhe siam an pui tih a sawi a. Sipaite hian helicopter hmangin thingtlang kilkhawr, lei min leh tui lianin kawngpui a tihchhiat avanga tlawhpawh theih lohna hmunah ei tur leh mamawhte an pe tih a sawi bawk.
Ruah hi Thawhlehni pawh khan an ram chhim lama lawngchawlhna khawpui, Karachi thlengin a la sur a, kawtthlerah tui tlingin chet velna a tibuai hle tih thuneituten an sawi a. Sorkar chuan fur atan a inbuatsaih tha niin insawi mah se awm thleng thlenga tui dai tur a tling.
Prime Minister Shehbaz Sharif-a chuan Zirtawpnia ruah sur nasa leh sabereka khuangkaih thlenga mi 280 vel thihna thlenna, Khyber Pakhtunkhwa province-a Buner district-ah chuan a rang thei ang ber zela thil buaipui turin thuneitute thu a pe tih Tarar-a chuan a sawi.
Thawhlehni pawh khan ruang 20 hmuh belh leh a nih thu district commissioner-in a sawi a. Rescue team-ten chin hriat lohva la awm mi 150 chuang zawn hna an la thawk mek bawk.
Khaw tam taka mite chuan mosque loudspeaker atangin inralrinna puan a awm loh avang leh sorkar puihna a thlen muan avangin an thinrim hle a. Sorkar erawh chuan mi chengte hi tui lian thei hrilh lawk an ni tih a sawi ve thung.
Sharif-a chuan Thawhtanni khan tui lian tuarte puih hna thawk mek chungchang hi thuneitu sangte nen an sawiho.
Kum tin Pakistan khawpui liante hi furah an buai ziah a, ruahmanna awm loh vanga puih a ni a. Fur hi July atanga September inkar a ni.
Thuneitute chuan kum 2022-a tui lian, mi 1,700 chuang thihna thlenna ang kha Pakistan-ah a thleng nawn leh thei niin an sawi a. Sik leh sa inthlak nasa nghawng niin an sawi bawk.