Daily Newspaper

Mi 5000 vel enkawl thei turin inbuatsaih

6
Covid-19 natna vei enkawltu tur lak belh dawn

Aizawl, August 20 : Mizoramah Covid-19 natna vei an awm belh zel a, Mizoram sorkar pawh mi 5000 vel enkawl thei turin a inbuatsaih mek. Dam lo enkawl hnathawk tur pawh inlak belh tum a ni.

“Positive hi kan neih belh zel a, an awm belh zel dawn em tih chu kan hre lo a. Mahse inbuatsaih a ngai a, mi 5000, a then phei chuan mi 1000 vel enkawl thei tura inbuatsaih te an rawt a. Mi 5000 vel enkawl thei turin kan inbuatsaih mek a,” tiin health & family welfare board vice chairman Dr ZR Thiamsanga, MLA chuan The Aizawl Post a hrilh.

A hmanraw lam te, dam lo enkawlna tur hmun te, thawktu lam te, thil hrang hrang ngaihtuah belh mek a nih thu a sawi.

Tunah hian Mizoramin Covid-19 natna vei mi 800 vel enkawlna tur hmun a nei tih a sawi a, a veite hi a ruala vei an nih loh thu leh lut leh chhuak an awm avanga khum pawh indaih a nih thu sawiin, a vei hi awm belh zel ta se tih ngaihtuah tel a ngaih avangin a hmunhma hi ngaihtuah belh a ngaih thu a sawi.

Dam lo enkawl hnathawk tur lak belh tum a nih thu sawiin Dr Thiamsanga chuan, doctor te, nurse te, technician te, health worker te, chief minister Zoramthanga thu-a lak belh tum a nih thu, ‘honorarium basis’-a lak tum a nih thu te, health department-in mamawh tur zat an chhut mek thu te a sawi. Ningani hian health minister Dr R Lalthangliana hovin thawktu lak belh chungchang hi an thlir dawn tih a sawi bawk.
Covid-19 natna veite enkawl tura inpe (volunteer) an awm thu a sawi a, “A rei ta si a, hlawh nei lova an thawk hi a inthlahrunawm a, chief minister remtihnain anni pawh hi lawmman pek tum a ni,” a ti.

Covid-19 natna veite enkawlna hmun Covid Care Centre (CCC) ngaihtuah belh zel a nih thu sawiin Dr Thiamsanga chuan, sorkar quarantine facility-te hi CCC atana hman zui theih a beiseiawm thu leh a tul chuan kohhrante pawh an hmunhma hman hi dil a nih tur thu a sawi.

Hmanraw lam pawh indaih a nih thu leh chah belh zel a nih thu a sawi a, Rapid Antigen Test atana hman tur test kit 20000 chah mek a nih thu leh Kolkata a thlen tawh thu a sawi a, RT-PCR bikah chuan 5000 vel a la awm thu a sawi.

“Mi 5000 enkawlna tur hi kan mamawh thei a, kan mamawh lo thei bawk a,” a ti a, vawi leh khatah mi 5000 enkawlna tur hmun neih belh thut tur tihna a nih chuan loh thu sawiin, tuna neih sa bak hi a tul anga ngaihtuah belh zel tur a nih thu leh zawi zawia neih belhin, mi 5000 lenna tur khawp ngaihtuah hi tul lo thei pawh a nih tho thu a sawi bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy