Mizoram sorkarin July ni 1-ah Mizotaxi app hman tan tur a ti a, four wheeler taxi, two wheeler taxi leh auto rickshaw, Aizawla tlante chu he app hi hmang tura tih an ni. Mi 850-in an hmang tawh tih thu dawn a ni.
July ni 8 tlai lam thleng khan four wheeler taxi 231, two wheeler taxi 604 leh auto rickshaw 15-in he app hi an hmang tawh.
Thu dawn danin, he app hmang tura dil hi lirthei khalhtu mi 983 an ni a, mahse dilna thenkhat hnawl a nih avangin mi 850-in an hmang mek.
Amaherawhchu, he app hmang tawh mi 850-te zingah hian hmang mumal lo an awm a, online lo an thahnem a, two wheeler taxi-ah phei chuan mi 604 an inziak lut fel tawh chungin mi 100 vel chauhin an hmang tih thu dawn a ni.
Taxi an online tlem avang hian mipui lam pawhin an hmang tha thei lo a, hei vang hian taxi ‘book’ hnua cancel pawh a tam phah nia ngaih a ni.
Aizawl khawpuiah hian taxi chi hnih, four wheeler leh two wheeler a awm a, taxi chi hnih hi ni khatah 5800 vel an tlan ziah anga chhut a ni.
Traffic Police te’n an chhut danin, four wheeler taxi hi ni khatah 3224 an tlan thin a, two wheeler taxi hi 2591 an tlan thin ang a ni.
Taxi chi hnihte hi chawlhkar khatah ni khat zel an tlan a, sticker la chhuak zat atangin ni khata chawl zat pahin, chawhrualin four wheeler 3224 leh two wheeler 2591 an tlan thin angin an chhut a ni.
Mi 850-in Mizotaxi app hmang tawh
