‘Mi firfiak’ tia PM a sawina insawi fiah turin ECI-in Kharge ti

‘Mi firfiak’ tia PM a sawina insawi fiah turin ECI-in Kharge ti
Election Commission of India (ECI) chuan Congress President Mallikarjun Kharge-a hnenah Prime Minister Narendra Modi-a ‘firfiak’ tia a sawi chungchangah hriattirna a pein insawi fiah turin a ti.
Union Minister Nirmala Sitharaman, Kiren Rijiju, Arjun Ram Meghwal leh BJP hruaitu dang telna palaiten inthlan buaipuite hmua eptu hruaitu laka complaint an thehluh hnuah hriattirna hi pek a ni.
He thil sawi hi inthlan dan bawhchhiatna a nih thu sawiin darkar 24 chhunga chhanna pe turin a ti a ni.
Kharge-a hian Thawhlehnia thuthar lakhawmtute a kawmnaah Prime Minister Modi-a chu ‘mi firfiak’ tiin a sawi a, AIADMK-in Tamil Nadu-a politician lar thi tawh, CN Annadurai-a ngaihdan zawm chunga BJP nena thawhdunna tur thutlukna an siam a sawinaah a sawi a ni.
Kharge-a chuan, “Engtin nge heng AIADMK mite, anmahni ngeiin Annadurai-a thlalak dahtute hian engtin nge Modi-a hi an zawm theih ang? Amah hi firfiak a ni. A party hian intluktlanna leh dikna hi a pawm lo vang. Heng mite hian anmahni hi an zawm ve a, mipui rorelna an tichak lo tihna a ni a, Annadurai, Kamaraj, Periyar, Kaliagnar, Kaliagnar, Baba Saheb Ambedkar-te philosophy an tichak lo tihna a ni,” tiin Tamil Nadu-ah a sawi a ni.
Chanchinbu mi pakhatin an puhna chungchang a zawhnaah Congress hotu chuan Prime Minister Modi-a hian ‘mi leh political party-te a tihlau’ tihna a nih thu a sawi a. A hnuah erawh ‘firfiak’ tia a sawina erawh a nih loh thu a sawi thung.
“Prime minister dodalna thu ka sawi lo va. Prime minister hian politician leh candidate-te a tifirfiak a, hemi chungchangah hian chhiah lakah firfiarkna a thleng tih ka sawi a. Enforcement Directorate-in mi an dap a, Income Tax Department-in an dap a, CBI-in an dap bawk… He firfiak hi Prime Minister Modi-a’n a tiawlsam a. Firfiak ka ti lo… mite a tithinur a ni. Hei hi Chennai-a ka sawi kha a ni,” tiin Thawhlehni khan a sawi a ni.
A thusawi hian rorel lai, BJP a tithinrim hle a, Congress chu ‘Urban Naxal Party’ tiin an sawi.
Union home minister, BJP hruaitu Amit Shah-a chuan Nilaini khan Congress hruaitu, Rahul Gandhi-a nen an inhnaih avangin Kharge-a chuan tawng a tichhe hle niin a sawi.
Bengal-a Dum Dum-a inthlan rally neihnaah thu sawiin, “Firfiakte tihbotu Narendra Modi hi Congress President Mallikarjun Kharge-a’n firfiak tiin a sawi a. Rahul Baba bula awm reng hian Pu Kharge-a tawng pawh a tichhe tan a ni,” a ti.
Nilaini tuk khan BJP palaite chuan Kharge-a chu inthlan dan bawhchhia nia sawiin inthlan buaipuitu atangin a rang leh khauh taka hmalak an phut a ni.
ECI an hmuh zawhah BJP hruaitu, Rijiju-a chuan he thu hi India politic-a thil mak leh a hmaa a la awm ngai lo a nih thu a sawi zui.
Parliamentary Affairs Minister Rijiju-a chuan, “Election Commission-ah hian rinna famkim kan nei. A tul anga chak taka hma an lak kan beisei a. Hetiang tawngkam hian mipui rorelna kalhmang zahawmna a tihniam a ni,” a ti.