Daily Newspaper

Mi pathum hnenah huaisen chawimawina hlan

11

State Home Department buatsaihin Nilaini khan huaisen chawimawina – Jeevan Raksha Padak 2019 dawngtu mi pathum hnenah lawmman hlan a ni a, Home secretary Lalbiaksangi’n he chawimawina in a kentel medal, certificate leh cheque a hlan.

Home secretary chuan huaisen chawimawina dawngtu mi pathumten midangte nun chhanhim nana an nunna thap a, mahni nunna chan hial an awm chu lungchhiattlak mah se, an thil tih hi mihringin kan mihringpuite tana thil kan tih theih ropui ber a ni, tiin, hriatreng tlak a nih thu a sawi.

Jeevan Raksha Padak hrang hrang zinga sangber – Sarvottam Jeevan Raksha Padak 2019 chu tun tumah hian Lalrempuia (L) Armed Veng, Aizawl-in dawngin, a nupui Lalhmachhuani’n chawimawina hi a dawng. 2019 April 5 khan Lalrempuia hi balu lain Sairang luiah a kal a, lui kamah a fapa kum 10 mi Samuel Lalrinsanga chengkawl zawng chu a chesual a, tuiah a tla ta a ni. Lalrempuia hi tui hleuh thiam lo nichungin a fapa tuitla chhanhim tumin luiah zuanglutin a fapa chu a chhanhim a, mahse amah zawk chu tui a tlain, a thi a ni. Sarvottam Jeevan Raksha Padak hian medal, certificate leh sumfai nuai 2 a kengtel.

Uttam Jeevan Raksha Padak 2019 chu Lianhawla, Tuidam Mamit district-in a dawng a. 2018 May 15 khan Lianhawla leh a nupui Lalnunthari loa an feh chu, chawhmeh zawnga a nupui a kalsan zawk hlanin savawmin a nupui hi a lo bei a, a nupui mangang authawm chu hria in a tlanlet a, a chem ken lai chuan savawm chu a beilet a. A nupui hliam na tak tuar chu kawng lamah vak chhoin, tanpui turin a au a, a au ri chu lirtheia chuangten lo hriain an tanpui ta a ni. Lianhawla hi a bek, a khup leh a taksa dangah hliam na tak a tuar a, a nupui pawh hian a lu leh taksa peng dangah hliam na tak a tuar bawk a ni. He award hian medal, certificate leh sumfai nuai 1.5 a kengtel a ni.

Jeevan Raksha Padak 2019 chu Lalawmpuia, North Serzawl, Aizawl district-in a dawng a. 2019 June 26 khan an chenna in a kang a, chokaa gas cylinder chu a kangkai a. Gas cylinder alh lai chu pu chhuakin pawnlamah a theh chhuak a. A nu, a nupui leh a fate 5 nun a chanhim thei ta a ni. He award hian medal, certificate leh sumfai nuai 1 a kengtel a ni.

Kumina Independence Day lawmnaah huaisen chawimawina dawngtute hming hi puan a lo ni tawh a. Hrileng vangin a hunah tak medal-te hi Ministry of Home Affairs chuan a rawn thawn thei loa. Tunhnai khan a lo thleng chauh a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy