Mi tang chhuah leh tur zinga pariat an thi tawh

Mi tang chhuah leh tur zinga pariat an thi tawh
Israel leh Hamas inkahhai inremna thawh khatna kalpui meka Hamas-in Israeli an hren an chhuah leh hmabak mi 26 zinga pariat chu an thi tawh niin Israel-in a sawi.
Sorkar thupuangtu, David Mencer chuan Pathianni zan khan Palestinian hel pawl hnen atangin an chhuah leh tur leh an dinhmun tar lanna an dawng tih thuthar lakhawmtute hnena Thawhtanni khan a sawi.
“Hamas-in chhuah tura an tihte hi Israel-a intelligent hriat dan nen a inmil chiah a, ka sawi duh chu an zinga pariat chu Hamas hian an that tawh a ni,” a ti a, an hming erawh a sawi lo va. “An chhungte hnenah an dinhmun hi kan hrilh tawh a ni,” a ti.
January 19 atanga inkahhai an kalpui hnuah hmeichhe pasarih chu damin chhuah an ni tawh a, Israel hian an lung ina Palestinian an tantir mi 290 chuang an chhuah ve tawh bawk.
Pathianni zan khan Israeli Prime Minister Benjamin Netanyahu-a pisa chuan Hamas hian civil mi hmeichhia, Arbel Yehud, hmeichhe sipai Agam Berger-i leh mi dangte chu Ninganiah an chhuah leh dawn tih a puang.
Inrinniah mi dang pathum an chhuah leh dawn bawk niin a sawi.
Israeli sipaite hian October 7, 2023-a Hamas-ten an ram luhchilha mi 1,200 chuang an thah leh hren ture mi 251 an hruai phuba lak nan Hamas chhu chimit turin Gaza an rûn.
Hamas enkawl health ministry chuan he mi hnuah hian Gaza-ah mi 47,310 an thi tawh niin an sawi.
Israel chuan mi 87 hren an la awm a, an zinga 34 chu an thi tawh nia an hriat thu a sawi a. Heng mite bakah hian indona chhuah hmaa man tawh Israeli pathum an la awm bawk a, pakhat chu a thi tawh niin an hre bawk.
Hamas leh Israel ten inkahhai an kalpui mek hi a thawh khatna chauh a ni a, a thawh hnihna atan inbiak zui leh a la ngai a. An inrem leh thei a nih chuan mi hren dangte pawh chhuah chhunzawm a ni ang a, Israeli sipaite pawhin Gaza an chhuahsan zui ang.
Inkahhai inremna thawh hnihna tur sawiho hian February 4 atangin an thukhawm leh dawn a ni.
Thawh thumna leh a hnuhnung ber tur chu Gaza tun din lehna tur a ni dawn a, indona avangin a chhiat nasat hman em avangin kum rei tak pawh hei hi chuan a awh rin a ni a. Thawh thumna huangah vek hian Hamas mi hren thite ruang lak kir pawh a tel ang.
Israel-a Hostages and Missing Families Forum chuan an ram sorkar chu heng inkahhai inremna thawh thum ruahman hi pawm vek tur leh mi hren zawng zawng chhuah vek an nih ngei an phut.
Hetih lai hian Israeli sipaia medical corps deputy chief chuan mi hren chhuah thar pasarihte chuan an tan chhung zawng deuhthaw kha ‘leiverh chhungah an khawsa’ tih an sawi tih a sawi.
An chhuah dan hnaih khan enkawlna an dawn pawh a ziaawm hret hret a, inbual leh thawmhnaw inthlakte phalsak an nih bakah ei leh in tur tha pawh an pe nia an hrilh thu Col Banov-a hian a sawi bawk.