Myanmar sawrkar sipai tlanbo, raltlan zinga khawsa ve chuan a raltlan pui nupa na taka kut a thlak avangin tualthah tum thubuaiah thiam loh a chang a, kum 10 tang tur leh sumfai chawi turin court-in a hrem.
Thudawn danin, kum 2022 khan Myanmar sipai atangin Min Aung chu a silai nen tlanboin Mizoram lamah a tlanlut a, Champhai Zote-a raltlante dahnaah a awm a ni. A awmnaah hian 2022 September khan raltlan zing ami Lalmuanpuia te nupa chu an pindanah luhchilhin zu lei turin a ti a. Raltlan camp-ah hian ruihtheih thil lakluh phal a nih loh avangin Lalmuanpuia nupui Malsawmsangi chuan an kal theih loh tur thuin a chhang a. Min Aung thinrim chuan a chempui phawrhin Malsawmsangi hi a nghawngah leh a malpuiah a sat a; a nupui chhan tumtu Lalmuanpuia chu a khup dinglamah a sat zui a ni.
Min Aung hi a tlanbo nghal a, Hmunhmeltha phaiah hmuh niin, YMA hruaituten thlam pakhatah manin Champhai Police kutah an hlan a ni.
He thil thleng chungchangah hian Sub-Hqrs YMA Champhai Raltlan Committee chuan FIR an thehluh bakah hliam tuarte enkawl kawngah hma an la bawk.
Addl District & Sessions judge Sylvie Zomuanpuii Ralte chuan thuhretu hrang hrang sawi leh thil tisualtua puh finfiahna atangin Min Aung hi tualthah tum thubuaiah kum 7 chhung lung in tang tur leh Rs. 2000 chawi turin a hrem a. Na taka mi a hliam avangin kum 3 chhung lung in tang tur leh Rs. 1000 chawi turin a hrem bawk. A hremna hi kalkawp tirin kum 10 chhung lung in a tang anga, Rs. 3000 a chawi dawn. A sum chawi tur hi a pe thei lo a nih chuan thla 3 dang a tan belh dawn a ni.
Mi thah tum sipai tlanbo kum 10 lung in tang dawn
