Miami tana goal thun thulh thei lo Messi
Khawi hmunah mah insiamremna’na hun rei mamawh lo Lionel Messi chuan a club thar Inter Miami tan goal a khung chho mar zui zel a, Nilaini zan Florida inkhela Orlando City SC laka 3-1 hnehna an chan tum pawhin goal hnih a khung leh a, a team chu Leagues Cup round of 16 a luhpui.
Fort Lauderdale khaw khelmual DRV PNK Stadium-a a goal khat tihluh leh nen Argentine hian Major League Soccer team tan a zawn zatin game thum chhung goal a khung tling ta a, Miami fans hlimna siamsaktu a la ni tluang zel.
He match hi Florida tuamtu thlipui thawm thangva avangin minute 95 zetin an tan tlai a; inkhel an tan a, minute sarihna a kal mek laiin Inter Miami captain thar chuan a team hmahruaina goal a khung er zawk a; he goal hi khelmual lai tak tantlangtu line atanga box thlenga Argentine-in ball a tlanpui hnuah Robert Taylor chuan lehlam pawl defender engemawzat chipp khumin ball petu Messi tan a siamsak zeuh a, PSG striker hlui hian six-yard box tlang hriam laia ding chungin a awmin a lo dawng a, tuihnai zetin goal-ah a hlaplut.
Minute 10 an khel leh tihah Orlando tan Uruguayan midfielder Cesar Araujo chuan ball tlahlang la fuhin an siphurh a sut zet a; chawlhlawk hma minute thum la awmah Miami lamin an goal phai chhungkhat leh nghalin, Josef Martinez chuan penalty spot atangin Miami goal hnihna a chhuihlut.
Second half minute 72-ah counter-attack atanga Taylor leh Martinez thawhrah chhawr-in ven loh Messi chuan hnai set sawt atang bawkin he match-a a goal hnihna leh Inter goal thumna ni zui ta chu Pedro Gallese ven Orlando goal-ah a thun a, kum 36 ni tawh Argen-tine a chesual lo leh kher mai!
Ti khan, a club thar tana game thum a khelhah Messi hian goal nga a khawl tling der tawh a, a hmain he tournament kal lai group stage-ah Cruz Azul leh Atlanta United-in an lo dang zo lo tawh bawk a nih kha…
Hun pekbelh minute kuana a kal mek laiin Araujo chuan Orlando siphurh pakhat sut thenin a inhre hman a, mahse, video-assistant referee-in a endik hnuah offside vanga hnawlsak a ni.
Iter Miami CF hian inkhel danga 2-1-a Mexican side Mazatlan hnehtu FC Dallas an tum leh ang.
World Cup winner Messi lo lan hma khan Miami hi an match hnuhnung 11-a chak nei miah lo an ni a, captain thar an neih hnua an match hnuhnung pa-thumah an chak zawn thawt a, lei fuh tih loh rual a ni lo!
Nilaini game kha Messi Barcelona team-mate hlui Jordi Alba tan a Miami debut niin, second half minute 64-ah khelmual a lut a, ani pawhin a bultannaah a team thar a chakpui nghal.
Tarlan tawh thin angin, world class player uaithla lamin Major League Soccer an la pan chhunzawm kal zel a; Messi leh Alba Camp Nou team-mate hlui Sergio Busquets pawhin Florida zawm fel tawhin, coach lamah Barca leh Argentina manager hlui Tata Martino pawhin Phil Neville thlakin Inter Miami CF ngei hi a lo zawm tawh bawk a ni.
David Beckham-a team Miami hian Pathianni zaah FC Dallas chu Texas-ah an luhkhung dawn a; tarlan tawh angin, hei hi kum 2019 atanga khelh tan Leagues Cup quarter-final lut tur zawnna niin, he tournament kal lai hi United States leh Mexico club-te’n knockout format hmanga an khelh mek a ni.
Miami tana goal thun \hulh thei lo Messi
