Mizoram Institute of Comprehensive Education (MICE) School, Tuikual South ami chu a sak dan tur anga ruahman niloin sak a ni tih ZPM Thalai chuan an sawi a. Sawifiah turin sawrkar an phut tih an sawi.
ZPM Thalai Hqrs. hian MICE hi tlawhin school sak danah thil dik lo tam tak an hmu chhuak tih a sawi.’Laboratory room tur chu bo hmakin, a chhawng hnuai bera room tih pum a ni loa, retaining wall awm zat tur a awm kim lo niin kan hria. Retaining wall hian school building a do vek tur nia a lan laiin, a then laiah chuan a beam chinah chauh a do a, ruahsur huna tuihawk luanna tur leh tuichhe luanna tur hrim hrim luankawr engmah hmuh tur a awm lo,’ a ti.
Building chung berah railing (tlak dal/ vawn ban) siam vek tur nia ngaih a nih laiin, hmun tam zawkah siam a ni loa, naupang himna atan a derthawng hle nia an hriat thu te, toilet chungchangah a nih tur ang ni lo nasa hlea an hriat thu te, floor tinah naupang zunram thiarna an nei tur nia a lan laiin third floor-ah chiah toilet hi siam a ni a, naupangten harsatna an tawh phah rin a nih thu te a sawi.
‘He school sakah hian rikrum thila chhuahna tur ’emergency exit’ siam a ni loa, rualbanlote kalna tur siam tura ruahman a nih laiin, hetiang hi hmuh tur a awm lo,’ a ti.
School building bang lai leh a sirah khi chat a tam thu te, kawngkhar chokut ho pawh themlem te te hman a nih thu te ZPM Thalai hian sawiin, ‘MNF sawrkarin contract hna chhe lutuk hlir min hlui hi mipui hmuhsitnaah kan ngai a, CBSE school kan neih ve chhun hetianga phuailuaia min hlui duh sawrkar kan hrawn hi vanduaithlak kan ti a, zirna a ngaih thutak loh zia a chiang hle,’ a ti.